ស.ស.យ.ក ខេត្តស្វាយរៀង និងសមាគមជនជាតិជប៉ុន រួមគ្នាបង្កើតទស្សនីយភាពវប្បធម៌ប្រពៃណីកម្ពុជា-ជប៉ុន ដ៏អស្ចារ្យលើទឹកដីអង្គរ

សហភាពសហព័ន្ធយុវជនកម្ពុជា ខេត្តស្វាយរៀង និងសមាគមជនជាតិជប៉ុននៅកម្ពុជា បានចាប់ដៃសហការគ្នារៀបចំនូវព្រឹត្តិការណ៍​ផ្លាស់ប្តូរវប្បធម៌ប្រពៃណីរវាងកម្ពុជា-ជប៉ុន នៅក្នុងខេត្តសៀមរាប ដើម្បីអបអរសាទរខួបលើកទី៧០នៃទំនាក់ទំនងការទូតរវាងកម្ពុជា និងជប៉ុន។ ព្រឹត្តិការណ៍នេះ ក៏មានការចូលរួមគាំទ្រដោយស្ថានទូតជប៉ុនប្រចាំនៅកម្ពុជា និងក្រសួងវប្បធម៌ និងវិចិត្រសិល្បៈផងដែរ។ ព្រឹត្តិការណ៍រយៈពេល២ថ្ងៃនេះ បានបិទបញ្ចប់ហើយកាលពីយប់ថ្ងៃអាទិត្យជាមួយនឹងផ្ទាំងទស្សនីយភាពសិល្បៈ វប្បធម៌ចម្រុះដ៏អស្ចារ្យនៃប្រទេសកម្ពុជា និងប្រទេសជប៉ុន។

ព្រឹត្តិការណ៍ផ្លាស់ប្ដូរវប្បធម៌ ប្រពៃណី ដើម្បីអបអរសាទរខួបអនុស្សាវរីយ៍លើកទី៧០ នៃការបង្កើតទំនាក់ទំនងកាទូតរវាងកម្ពុជា- ជប៉ុន បានបង្ហាញអំពីសិល្បៈវប្បធម៌ប្រពៃណីដ៏ផូរផង់នៃប្រទេសទាំងពីរ។ ព្រឹត្តិការណ៍នេះ ក៏ត្រូវបានចាត់ទុកជាផ្នែកមួយនៃការខិតខំប្រឹងប្រែង ដើម្បីលើកកម្ពស់ការយល់ដឹង និងកិច្ចសហប្រតិបត្តិការអន្តរជាតិ អភិវឌ្ឍន៍ទំនាក់ទំនងសហប្រតិបត្តិការរវាងប្រទេសទាំងពីរ និងធ្វើឱ្យទំនាក់ទំនងមិត្តភាពប្រទេសទាំងពីរកាន់តែមានភាពស៊ីជម្រៅតាមរយៈការផ្លាស់ប្ដូរវប្បធម៌ប្រពៃណី។

ព្រឹត្តិការណ៍ផ្លាស់ប្តូរវប្បធម៌ប្រពៃណីនេះ ​មាន​ការចូលរួមសម្តែងដោយសិល្បករ​-​សិល្ប​ការិនី កម្ពុជា និងជប៉ុន ចំនួនជាង ១០០នាក់។ ផ្ទាំងទស្សនីយភាពជាច្រើនត្រូវបានសម្តែងឡើង ដូចជា ការសម្តែងវង់ភ្លេងខ្មែរចម្រុះ (កម្ពុជា) ការសម្តែង Classic/distant sound of deer (ជប៉ុន) ការសម្តែង Reison Kuroda/Smoke (ជប៉ុន) ការសម្តែង Dai Fujikura / Ai for sho (ជប៉ុន) ការសម្តែង Motoharu Kawashima / Aison-ritsu Doufu (ជប៉ុន) ការសម្តែង Classic / Dragonfly (Kse Diev) (ជប៉ុន) ការសម្តែង Yu Kuwabara / title, trio (ជប៉ុន) ការសម្តែងរបាំព្រះរាជទ្រព្យ (កម្ពុជា) ការសម្តែងល្ខោនខោល (កម្ពុជា) ការសម្តែងរបាំប្រពៃណីចម្រុះ និងទស្សនីយភាពពិសេស (កម្ពុជា) ការសម្តែង Noh (ជប៉ុន) ការសម្តែង Gagaku (ជប៉ុន) និងការសម្តែងវង់តន្ត្រីជុំគ្នារវាងសិល្បករ សិល្បការិនី កម្ពុជា-ជប៉ុន។

ទស្សនីយភាពដ៏អស្ចារ្យនៃព្រឹត្តិការណ៍នេះ ទទួលបានគាំទ្រយ៉ាងខ្លាំងពីប្រជាពលរដ្ឋ ភ្ញៀវជាតិ និង អន្តរជាតិ ចូលរួមទស្សនាយ៉ាងច្រើនកុះករ។ ពលរដ្ឋភ្ញៀវជាតិ និងអន្តរជាតិដែលបានចូលរួមទស្សនា បានបង្ហាញចំណាប់អារម្មណ៍ថា នេះ គឺជាលើកទីមួយហើយដែលពួកគាត់បានទស្សនានូវទស្សនីយភាពដ៏អស្ចារ្យបែបនេះ ដែលសម្ដែងដោយសិល្បករសិល្បការិនីខ្មែរ និងជប៉ុន នៅលើទឹកដីអង្គរ៕

ដោយ៖ ជុន កុសល