CDC អនុម័តគម្រោងវិនិយោគចំនួន២០ ទំហំទុនជាង ៦០០លានដុល្លារ ក្នុងខែវិច្ឆិកា

ក្រុមប្រឹក្សាអភិវឌ្ឍន៍កម្ពុជា ដែលហៅកាត់ថា(CDC) បានឱ្យដឹងថា សម្រាប់ខែវិច្ឆិកា ឆ្នាំ២០២៣នេះ CDC បានអនុម័តគម្រោងវិនិយោគចំនួន២០ មានទុនវិនិយោគចំនួន ៦១៣,៤៦លានដុល្លារ និងអាចបង្កើតការងារ ជូនប្រជាពលរដ្ឋបានចំនួន២១២៨០នាក់។

ចំនួននេះបើធៀបទៅនឹងខែតុលាឆ្នាំ២០២៣ មានការថយចុះ ១១គម្រោង តែទុនវិនិយោគច្រើនជាង ខណៈខែ តុលា មានគម្រោងវិនិយោគរហូតដល់៣១ មានទុនចំនួន ១៨១លានដុល្លារ និងអាចផ្តល់ការងារជូនប្រជាពលរដ្ឋបានចំនួន ១០៨៦០នាក់។

បើតាម CDC បានបន្តថា ក្នុងចំណោមគម្រោងវិនិយោគចំនួន ២០ក្នុងនោះ គម្រោងធំជាងគេគឺគម្រោងសាង សង់វារីអគ្គិសនីស្ទឹងឫស្សីជ្រុំកណ្តាល មានអានុភាព ៧០មេហ្កាវាត់ នៅស្រុកមណ្ឌលសីមា និងគម្រោង សាងសង់ វារីអគ្គិសនីវាលថ្មកំបុត អានុភាព ១០០មេហ្កាវាត់ នៅស្រុកថ្មបាំង ខេត្តកោះកុង តាមរូបភាពសាងសង់, អាជីវកម្ម, និងផ្ទេរ (BOT) ក្នុងទុនវិនិយោគប្រមាណ ៤៤៧,៥លានដុល្លារ ។

បន្ទាប់មកទៀត គម្រោងវិនិយោគអភិវឌ្ឍន៍ស្ថានីយ៍ផលិតអគ្គិសនីដើរដោយថាមពលពន្លឺព្រះអាទិត្យ អានុភាព ៦០មេហ្កាវ៉ាត់ ជាមួយប្រព័ន្ធផ្ទុកថាមពលអគ្គិសនីខេត្តស្វាយរៀង ដែលមានទីតាំងវិនិយោគស្ថិតនៅភូមិកណ្តាល ឃុំស្វាយចេក ស្រុករំដួល ខេត្តស្វាយរៀង ក្នុងទុនវិនិយោគប្រមាណ ៦៥,៥លានដុល្លារនិងគម្រោងបង្កើត រោងចក្រផលិតស្បែកជើង និងគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិ ត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគ ប្រមាណ ១៣,៣លានដុល្លារ។ក្រៅពីនេះមានគម្រោងវិនិយោគមានតម្លៃចាប់ពីជាង១លានដុល្លាររហូតដល់ជាង៨លានដុល្លារ៕

អត្ថបទ ៖ សំអឿន