ព័ត៌មានជាតិ

យុវជនមកពីគ្រួសារក្រីក្រ នឹងទទួលបានឱកាសសិក្សាជំនាញបច្ចេកទេស ជាង ២ ពាន់កន្លែង ឥតគិតថ្លៃ ពីវិទ្យាស្ថានជាតិពហុបច្ចេកទេសតេជោសែនខេត្តកណ្ដាល

បានផុស

១ year មុន

នៅ

ថ្ងៃអង្គារ ៥ ធ្នូ ២០២៣

ដោយ

កាលពីថ្ងៃទី ៤ ខែធ្នូ ឆ្នាំ ២០២៣ វិទ្យាស្ថានជាតិពហុបច្ចេកទេសតេជោសែន ខេត្តកណ្ដាល បានប្រកាសផ្តល់ការសិក្សាជំនាញបច្ចេកទេសជាង ២០០០ កន្លែង លើជំនាញសំខាន់ៗ ចំនួន ១២ មុខ ដល់យុវជនមកពីគ្រួសារក្រីក្រ និងងាយរងហានិភ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្ដីប្រកាសព័ត៌មាន អាហារូបករណ៍សំខាន់ៗ ដែលវិទ្យាស្ថានជាតិពហុបច្ចេកទេសតេជោសែន បើកឲ្យសិក្សារួមមាន ៖ ជំនាញសិក្សាផ្នែកការងារកំបោរ (សំណង់) ចំនួន ៣០០ នាក់, ការដំឡើងបណ្ដាញបំពង់ទឹកចំនួន ១៥០ នាក់, ការដំឡើងបណ្ដាញអគ្គិសនីក្នុងអគារចំនួន ៣០០ នាក់, ការផ្សារអគ្គិសនីចំនួន ១៥០ នាក់, ការថែទាំ និងជួសជុលម៉ាស៊ីនត្រជាក់រថយន្តចំនួន ១៥០ នាក់, ការថែទាំ និងជួសជុលអគ្គិសនីរថយន្តចំនួន ១៥០ នាក់, ការថែទាំ និងជួសជុលរថយន្តចំនួន ១៥០ នាក់, សេវាកម្មកុំព្យូទ័រចំនួន ១៥០ នាក់, សេវាកម្មបរិក្ខារត្រជាក់ក្នុងគេហដ្ឋានចំនួន ១៥០ នាក់, ការងារគេហកិច្ចចំនួន ១៥០ នាក់, ការចិញ្ចឹម និងថែទាំត្រីប្រាចំនួន ១៥០ នាក់ និងការកែច្នៃបន្លែ និងផ្លែឈើចំនួន ១៥០ នាក់។

សេចក្ដីប្រកាសព័ត៌មានដដែល បញ្ជាក់ថា បេក្ខជនដែលអាចសិក្សាបាន នឹងទទួលបានថវិកាឧបត្ថម្ភចំនួន ២៨ ម៉ឺនរៀល ត្រូវមានអាយុចាប់ពី ១៥ ឆ្នាំ ឡើងទៅ មានបណ្ណសមធម៌ (ក្រីក្រ ១-២) និងបណ្ណគ្រួសារងាយរងហានិភ័យ ហើយត្រូវភ្ជាប់ជាមួយអត្តសញ្ញាណប័ណ្ណសញ្ជាតិខ្មែរ ឬសំបុត្រកំណើត។ ចំពោះម៉ោងសិក្សា បេក្ខជនទាំងអស់ អាចសិក្សាចំនួន ៣ វេន គឺវេនថ្ងៃចន្ទ-សុក្រ (ព្រឹក-ល្ងាច) រយៈពេល ៤ ខែ និង វេនថ្ងៃសៅរ៍-អាទិត្យ រយៈពេល ១០ ខែ ហើយដោយឡែកវេនយប់ ត្រូវសិក្សាចំនួន ៨ ខែ។ ក្រៅពីសិក្សាជំនាញវិជ្ជាជីវៈ និងបច្ចេកទេស សិក្ខាកាម នឹងអាចចុះកម្មសិក្សាហាត់ការតាមបណ្តាក្រុមហ៊ុនឯកជន សហគ្រាសដែលជាឱកាសការងារខ្ពស់។

គួរបញ្ជាក់ថា ការប្រកាសផ្តល់អាហារូបករណ៍ពីវិទ្យាស្ថានជាតិពហុបច្ចេកទេសតេជោសែនខេត្តកណ្តាល នាពេលនេះ ធ្វើឡើងបន្ទាប់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជាប្រមុខរាជរដ្ឋាភិបាលកម្ពុជា កាលពីថ្ងៃទី ១៤ ខែវិច្ឆិកា កន្លងទៅនេះ បានដាក់ចេញនូវការបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន ១,៥ លាននាក់៕