១១ខែឆ្នាំនេះ កម្មករនិយោជិតជួបគ្រោះថ្នាក់កាងារ ថយចុះជាង ៤% ប្រមាណ ៥៧០នាក់

លោក កត្តា អ៊ន អ្នកនាំពាក្យ ក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍នៅរសៀល ថ្ងៃទី៥ ខែធ្នូ នេះថា ចាប់ពីខែមករា រហូតមកដល់ ខែវិច្ឆិកា ឆ្នាំ២០២៣ នេះ ស្ថានភាពគ្រោះថ្នាក់ហានិភ័យកាងារនៅក្នុងរោងចក្រទូទាំងប្រទេសមានកម្មករនិយោជិតជួបគ្រោះថ្នាក់កាងារសរុបចំនួន ១៣ ១៩១ នាក់ ស្រី ៦ ៨៤០ នាក់។ ចំនួននេះបើប្រៀបធៀបនឹងរយៈពេលដូចគ្នា ក្នុងឆ្នាំ២០២២ កន្លងទៅឃើញថា មានការថយចុះចំនួន ៤,១៥% ស្មើនឹង ៥៧១ នាក់ ស្រី ៥៤៦នាក់។​

លោក កត្តា អ៊ន បានបន្តទៀតថា ក្នុងនោះមានកម្មការិនីដួលសន្លប់ចំនួន ២៩ នាក់ និង បាត់បង់ជីវិតដោយសារគ្រោះថ្នាក់កាងារចំនួន ១៩៩ នាក់ ស្រី ៥៦នាក់។ ក្នុងចំណោមគ្រោះថ្នាក់កាងារសរុបចំនួន ១៣ ១៩១ នាក់ ក្នុងនោះគ្រោះថ្នាក់ចរាចរពេលធ្វើដំណើរទៅធ្វើការមានចំនួន ៧ ១៩២ នាក់ ស្រី ៤ ០៧១ នាក់ និងគ្រោះថ្នាក់នៅកន្លែងធ្វើការមានចំនួន ៥ ៩៩៩ នាក់ ស្រី ២ ៧៦៩ នាក់។

លោក កត្តា អ៊ន បានបញ្ជាក់ថា គិតត្រឹមខែមិថុនា ឆ្នាំ២០២៣ កម្ពុជាមានរោងចក្រសហគ្រាសចំនួន ១៧ ២៥១ រោងចក្រ និងមានកម្មករនិយោជិតសរុបចំនួនជិត ១,៥ លាននាក់ ក្នុងនោះរោងចក្រសហគ្រាសក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប មានចំនួន ១ ៣៣២ រោងចក្រ មានកម្មករនិយោជិតសរុបប្រមាណ ៨៤ ម៉ឺននាក់ ដោយទទួលបានប្រាក់ចំណូលប្រចាំឆ្នាំប្រមាណជិត ៣ ពាន់លានដុល្លារ៕

អត្ថបទ៖ សំអឿន