ក្រសួងការងារប្រកាសពីតម្រូវការកម្លាំងពលកម្មជិត៤ម៉ឺនកន្លែងសម្រាប់បម្រើវិស័យធំៗចំនួន៣

ក្រសួងការងារនិងបណ្តុះបណ្តាលវិជ្ជាជីវៈ បានប្រកាសពីតម្រូវការកម្លាំងពលកម្មចំនួន ៣៨៥៦៩កន្លែងសម្រាប់បម្រើទៅលើវិស័យធំៗចំនួន៣រួមមានវិស័យឧស្សាហកម្ម សេវាកម្ម និងកសិកម្ម។

បើតាមក្រសួងការងារក្នុងចំណោមកម្លាំងពលកម្មជិត៤ម៉ឺនកន្លែងក្នុងនោះ វិស័យឧស្សាហកម្មមានតម្រូវការច្រើនជាងគេ គឺមានចំនួន២៣៣២៧កន្លែង វិស័យសេវាកម្មមានចំនួន៤៨៤៥កន្លែង និងវិស័យកសិកម្មមានចំនួន១០៣៩៧កន្លែង។ ក្នុងនោះនៅខេត្តរតនគីរី មានតម្រូវការផ្នែកកសិកម្មចំនួន៧០០០កន្លែង ខេត្តកំពង់ស្ពឺ មាន៩៧៦៧កន្លែង ក្នុងនោះវិស័យឧស្សាហកម្មមាន៩៧០១កន្លែង និងសេវាកម្ម៦៦កន្លែង រាជធានីភ្នំពេញមាន៣៦១៤កន្លែង ក្នុងនោះផ្នែកឧស្សាហកម្មចំនួន១២៦០កន្លែង និងសេវាកម្ម២៣៥៤កន្លែង ក្រចេះមាន៣២៤៣ ក្នុងនោះមានឧស្សាហកម្ម១០០២កន្លែង សេវាកម្មនិងកសិកម្ម២២៤១កន្លែង កំពង់ចាម មាន៣០០៧កន្លែង ក្នុងនោះមានឧស្សាហកម្មចំនួន៣០០០កន្លែង និងសេវា
កម្ម៧កន្លែងកណ្តាលមាន៤៣០០កន្លែង ក្នុងនោះឧស្សាហកម្មចំនួន៤២៣០កន្លែង និងសេវាកម្ម៧០កន្លែង ខេត្តព្រះសីហនុមាន១៧២៥កន្លែង ក្នុងនោះឧស្សាហកម្មចំនួន១៦៨៣កន្លែង និងសេវាកម្ម៤២កន្លែង។ ស្វាយរៀងមាន​១១០៦កន្លែងក្នុងនោះឧស្សាហកម្ម៩៩០កន្លែង និងសេវាកម្ម១១៦កន្លែង ស្ទឹងត្រែងមាន១០៨៥កន្លែង ក្នុងនោះមានសេវាកម្មចំនួន៤២កន្លែងនិងកសិកម្មមាន១០៤៣កន្លែង សៀមរាបមានសេវាកម្ម៦៦៨កន្លែងនិងខេត្តផ្សេងៗមាន៣០៥៤កន្លែងក្នុងនោះឧស្សាហកម្ម១៤៦១កន្លែង សេវាកម្ម១៤៨០កន្លែង និងកសិកម្ម១១៣កន្លែង។

ក្រសួងការងារបានបន្តទៀតថា កម្លាំងពលកម្មជិត៤ម៉ឺននាក់ នឹងត្រូវបែងចែកទៅតាមប្រភេទមុខរបរចំនួន១០រួមមាន អ្នកបញ្ជាម៉ាស៊ីនដេរមានចំនួន១៩៨៨២កន្លែង កម្មករចំការដំណាំចំនួន១០៣០៣កន្លែង មន្ត្រីឥណទាន និងកម្ចីប្រាក់១៥៤០​កន្លែង អ្នកតំណាងលក់ផ្នែកពាណិជ្ជកម្ម៨៣៣កន្លែង កម្មករក្នុងផលិតកម្ម១២២៤កន្លែង អ្នកដុសខាត់លោកហៈ អ្នកក្រឡឹងកង់ អ្នកសំលៀងឧបករណ៍១០០០ អ្នកបច្ចេកទេសត្រួតពិនិត្យដំណើរការផលិត៦២២កន្លែងវិជ្ជាជីវៈខាងការផ្សព្វផ្សាយនិងទីផ្សារ៣៨៥កន្លែង អ្នកប្រឹក្សាយោបល់និងវិនិយោគទុន១៦៥កន្លែង បុគ្គលិកទទួលនិងផ្តល់ព័ត៍មាននៅទីចាត់ការកណ្តាល១៦០កន្លែងនិងមុខរបរផ្សេងៗ ២៤៥៥កន្លែង។

គួរបញ្ជាក់ថា នៅក្នុងរយៈពេល៣ខែចុងក្រោយនេះ ក្រសួងការងារបានស្វែងរកការងារជូនដល់យុវជនបានជាង ៣ពាន់នាក់៕

អត្ថបទ៖ សំអឿន