​មន្ទីរ​កសិកម្ម​ខេត្ត​បាត់ដំបង​ ចេញ​​របាយការណ៍​ផលប៉ះពាល់គ្រោះធម្មជាតិ​​លើ​ដំណាំ​កសិកម្ម

ជំនន់ទឹកភ្លៀងក្នុងឆ្នាំ២០២៣ មានផល​ប៉ះពាល់​តិច​ជាងឆ្នាំកន្លងទៅសម្រាប់ខេត្តបាតដំបងទៅលើផលដំណាំស្រូវ និងផលដំណាំរួមផ្សំផ្សេងៗទៀត។

បើយោងតាមស្ថិតិពីមន្ទីរកសិកម្មបានបង្ហាញឲ្យដឹងថា ឆ្នាំ២០២៣ មានស្រុកចំនួន ៣ ដែលប្រឈមជំនន់ទឹកភ្លៀងបានបង្កឲ្យស្រូវរបស់ប្រជាកសិករបានរងផលប៉ះពាល់និងខូចខាតមួយចំនួន បើគិតត្រឹមថ្ងៃទី១៨ខែតុលាឆ្នាំ២០២៣។

ស្រុកទាំង ៣ ដែលរងផលប៉ះពាល់ជំនន់ទឹកភ្លៀងរួមមាន ស្រុកថ្មគោល,ស្រុកឯកភ្នំ,ស្រុកសង្កែ ដែលក្នុងនោះ ស្រុកថ្មគោល ជំនន់ទឹកភ្លៀងបានគ្របដណ្តប់ទៅលើឃុំចំនួន ៦ ក្នុងចំណោមឃុំទាំង ១០ ដែលបង្កឲ្យមានផលប៉ះពាល់​លើផលដំណាំស្រូវចំនួន ៥,៣៧៧ ហិកតានិងខូចខាតចំនួន ៤,៣៤៤ ហិកតា។

ស្រុកឯកភ្នំ ជំនន់ទឹកភ្លៀងបានវាយលុកលើឃុំចំនួន ៥ ក្នុងចំណោមឃុំទាំង ៧ ក្នុងនោះដំណាំស្រូវដែលរងផលប៉ះពាល់ចំនួន ២,៩២៣ ហិកតា និងខូចខាតចំនួន២,៥៧៣ហិកតា។ ស្រុកសង្កែប៉ះពាល់លើឃុំចំនួន ៩ ក្នុងចំណោមឃុំទាំង ១០ បង្ក​ឲ្យ​ប៉ះពាល់ដំណាំស្រូវលើផ្ទៃដីចំនួន ៣,៦៧៦ ហិកតា និង​ខូចខាតលើផ្ទៃដី១,១១២ហិកតា។

មន្ត្រីកសិកម្មបានបញ្ជាក់បន្ថែមថា គ្រោះរាំងស្ងួតបានបង្កឲ្យមានផលប៉ះពាល់និងខូចខាតលើស្រុកចំនួន ២ ក្នុងនោះស្រុក​បវេលប៉ះពាល់លើឃុំចំនួន ៥ ក្នុងចំណោមឃុំទាំង ៩ ដែលធ្វើឲ្យផលដំណាំស្រូវចំនួន ៦៣៩០ ហិកតា រងផលប៉ះពាល់ និង​ខូចខាតលើផ្ទៃដី​១,២១៩​ហិកតា។ ស្រុករុក្ខគីរី បង្កផលប៉ះពាល់និងខូចខាតទៅលើឃុំចំនួន ១ ក្នុងចំណោមឃុំទាំង ៥ ក្នុងនោះប៉ះពាល់ដំណាំស្រូវចំនួន ៩៥០ ហិកតា និង​ខូចខាតចំនួន ៦០០ ហិកតា។ ក្រៅពីផលដំណាំស្រូវ ក៏មានការប៉ះពាល់និងខូចខាតដំណាំរួមផ្សំមួយផ្នែកទៀតផងដែរ៕

អត្ថបទ៖ សៅ សារិទ្ធ