ឧត្តមសេនីយ៍ឯក នាក់ យុទ្ធា ណែនាំឲ្យបន្តយកចិត្តទុកដាក់ ការងារស្រង់ស្ថិតិគ្រប់មុខសញ្ញាពាក់ព័ន្ធនឹងគ្រឿងញៀន

មន្ត្រីជាន់ខ្ពស់អាជ្ញាធរជាតិប្រយុទ្ធប្រឆាំងគ្រឿងញៀន បានណែនាំអ្នកពាក់ព័ន្ធទាំងអស់ត្រូវបន្តយកចិត្តទុកដាក់ ការងារស្រង់ស្ថិតិគ្រប់មុខសញ្ញាពាក់ព័ន្ធនឹងគ្រឿងញៀន ដែលជាការងារដ៏សំខាន់។  

លោកឧត្តមសេនីយ៍ឯក នាក់ យុទ្ធា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន និងលោក ខ្លូត ចិន្តា អភិបាលរង និងជាប្រធានលេខាធិការដ្ឋាន គណៈកម្មាធិការត្រួតពិនិត្យគ្រឿងញៀនខេត្តកំពង់ចាម នៅថ្ងៃទី ៦ ខែធ្នូ ឆ្នាំ ២០២៣ បានដឹកនាំកិច្ចប្រជុំផ្សព្វផ្សាយបទបញ្ជា គោលការណ៍ណែនាំពាក់ព័ន្ធនានា ក្នុងការងារប្រយុទ្ធប្រឆាំងគ្រឿងញៀន ដែលបានដាក់ចេញដោយរាជរដ្ឋាភិបាល និងអាជ្ញាធរជាតិប្រយុទ្ធប្រឆាំងគ្រឿងញៀននាពេលកន្លងមក និងស្តាប់របាយការណ៍ ស្តីពី វឌ្ឍនភាពការងារប្រយុទ្ធប្រឆាំងគ្រឿងញៀន ក្នុងខេត្តកំពង់ចាម។

លោកខ្លូត ចិន្តា ក្នុងនាមគណៈកម្មាធិការត្រួតពិនិត្យគ្រឿងញៀនខេត្តកំពង់ចាម បានលើកឡើងអំពីការចាត់តាំងអនុវត្តយ៉ាងសកម្ម ក្នុងការងារប្រយុទ្ធប្រឆាំងគ្រឿងញៀន ស្របតាមផែនការ បទបញ្ជា និងគោលការណ៍ណែនាំនានា ដែលបានដាក់ចុះកន្លងមក ទទួលបានលទ្ធផលល្អគួរឲ្យកត់សម្គាល់។

ដើម្បីលើកកម្ពស់ប្រសិទ្ធភាពការងារប្រយុទ្ធប្រឆាំងគ្រឿងញៀន ក្នុងខេត្តកំពង់ចាម ស្របតាមគោលការណ៍ណែនាំរបស់លោកសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាពិសេសដើម្បីឆ្លើយតបទៅនឹងឆន្ទៈដ៏មុតស្រួច របស់សម្តេចមហាបវរធិបតី នាយករដ្ឋមន្រ្តីនៃកម្ពុជា ក្នុងការដោះស្រាយផលប៉ះពាល់ និងគ្រោះថ្នាក់ នៃគ្រឿងញៀនចំពោះសុខុមាលភាពប្រជាពលរដ្ឋ សន្តិសុខសណ្តាប់ធ្នាប់ និងការអភិវឌ្ឍន៍សង្គមនោះ លោកឧត្តមសេនីយ៍ឯក នាក់ យុទ្ធា ជាមួយនឹងការផ្សព្វផ្សាយខ្លឹមសារសេចក្តីណែនាំលេខ ០០២ បានធ្វើការណែនាំបន្ថែមដល់គណៈកម្មាធិការត្រួតពិនិត្យគ្រឿងញៀនខេត្ដកំពង់ចាម នូវកញ្ចប់ការងារទាំង ៧ របស់លោកសន្តិបណ្ឌិត នេត សាវឿន ចំនួន ៧ចំណុច។

ចំណុចទាំង ៧នោះ​ រួមមាន៖ ១.ការងារអនុវត្តច្បាប់, ២.ការងារត្រួតពិនិត្យសារធាតុគីមីផ្សំ, ៣.ការបង្ការទប់ស្កាត់ការចរាចរគ្រឿងញៀនឆ្លងកាត់ព្រំដែន, ៤.ការងារផ្សព្វផ្សាយអប់រំ, ៥.ការងារកិច្ចសហប្រតិបត្តិការអន្តរជាតិ, ៦.ការសំអាតប្រាក់ពាក់ព័ន្ធនឹងគ្រឿងញៀន និង៧. ការងារព្យាបាល ស្តារនីតិសម្បទាអ្នកញៀនគ្រឿងញៀន និងសមាហរណកម្ម។

​នៅក្នុឱកាសនោដែរ លោកឧត្តមសេនីយ៍ឯក នាក់ យុទ្ធា បានថ្លែងបន្ថែមដោយឲ្យអ្នកពាក់ព័ន្ធទាំងអស់ត្រូវបន្តយកចិត្តទុកដាក់ ការងារស្រង់ស្ថិតិគ្រប់មុខសញ្ញា ពាក់ព័ន្ធនឹងគ្រឿងញៀន ដែលជាការងារសំខាន់ណាស់​ សម្រាប់បម្រើដល់ការងារប្រយុទ្ធប្រឆាំងគ្រឿងញៀន ហើយគ្រប់សមាសភាពនៅសហគមន៍យល់ដឹងពីបញ្ហា​គ្រឿងញៀន​គ្រប់គ្នា គឺគ្មានអ្នកប្រើ គ្មានអ្នកលក់​ និងកាត់ផ្តាច់បានទីផ្សារគ្រឿងញៀន៕