មន្ត្រី៧រូប ត្រូវបានប្រកាសចូលកាន់តំណែងនៅអាជ្ញាធរជាតិប្រយុទ្ធប្រឆាំងគ្រឿងញៀន

នៅព្រឹកថ្ងៃទី៧ ខែធ្នូ ឆ្នាំ២០២៣នេះ លោក នេត សាវឿន ឧបនាយករដ្ឋមន្ដ្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអញ្ជើញជាអធិបតីក្នុងពិធីប្រកាសចូលកាន់តំណែងអគ្គលេខាធិការរង និងប្រធាននាយកដ្ឋាន ចំនួន ៧រូប នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន។

អនុក្រឹត្យរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចតែងតាំងមុខតំណែងដល់មន្ត្រីរាជការ និងមន្ត្រីនគរបាលជាតិថ្នាក់ឧត្ដមសេនីយ៍ នៃក្រសួងមហាផ្ទៃ ចំនួន៧រូប ឱ្យកាន់តំណែងនៅអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ដោយក្នុងនោះ​ លោកឧត្តមសេនីយ៍ទោ ឡេង ប៊ុនណា និងលោក សំរិត ជេដ្ឋាភិរម្យ ត្រូវបានតែងតាំងជាអគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន។

លោកឧត្តមសេនីយ៍ឯក យី សិទ្ធិ ត្រូវបានតែងតាំងជាប្រធាននាយកដ្ឋានព្យាបាល ស្តារនីតិសម្បទា និងសមាហរណកម្ម លោកឧត្ដមសេនីយ៍ឯក លឹម តុងហួត ជាប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ លោកឧត្តមសេនីយ៍ទោ ឃន តារាសម្បត្តិ ជាប្រធាននាយកដ្ឋានអនុវត្តច្បាប់ លោកឧត្តមសេនីយ៍ទោ អ៊ុយ រ៉ាត់ ជាប្រធាននាយកដ្ឋានត្រួតពិនិត្យសារធាតុញៀន និងសារធាតុគីមីផ្សំ។ ដោយឡែក លោកឧត្តមសេនីយ៍ទោ ប៉ាន់ សុវណ្ណារិទ្ធ ត្រូវតែងតាំងជាប្រធាននាយកដ្ឋាននីតិកម្ម ផែនការ និងបណ្តុះបណ្តាល លោកឧត្តមសេនីយ៍ត្រី អ៊ុយ សមផល្លារិទ្ធិ ជាប្រធាននាយកដ្ឋានសហប្រតិបត្តិការអន្តរជាតិ និងលោកវេជ្ជបណ្ឌិត ជុន ហុងពាន ជាប្រធានមន្ទីរពិសោធន៍គ្រឿងញៀន។

រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្ដេចធិបតី ហ៊ុន ម៉ាណែត បានសម្រេចប្រគល់តួនាទីជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជូនលោកឧបនាយករដ្ឋមន្ត្រី នេត សាវឿន ជាអ្នកដឹកនាំ​ អមដោយឧបនាយករដ្ឋមន្ត្រីចំនួន៣រូប ជាអនុប្រធាន រួមមាន លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ខណៈលោកទេសរដ្ឋមន្ត្រី ព្រុំ សុខា ជាអនុប្រធានប្រចាំការ៕