ទុន​គម្រោង​សាងសង់​កើន​ឡើងទ្វេដងដល់​ ៥ ពាន់លាន​ដុល្លារ រយៈពេល ១០ ខែ ​ឆ្នាំ ២០២៣

នៅក្នុងរយៈពេល ១០ ខែឆ្នាំ២០២៣ គម្រោងជិត ៣ ពាន់គម្រោងដែលមានទុនវិនិយោគប្រមាណជាង ៥ ពាន់លានដុល្លារត្រូវបានក្រសួងរៀបចំដែនដី នគរូបនីយ កម្ម និងសំណង់ បានផ្តល់លិខិតអនុញ្ញាតសាងសង់ទូទាំងប្រទេស។

ថ្លែងបើកសន្និបាតបូកសរុបការងារប្រចាំឆ្នាំ និងសម្ពោធការតាំងពិព័រណ៍ឧស្សាហកម្មសំណង់កម្ពុជា-អន្តរជាតិ ឆ្នាំ ២០២៣​ នៅព្រឹកថ្ងៃទី ០៦ ធ្នូ លោក ផារ៉ា មង្គល តំណាងលោកសាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា ក្នុងរយៈពេល ១០ ខែឆ្នាំ ២០២៣ ក្រសួងបានផ្តល់លិខិតអនុញ្ញាត​សាងសង់ទូទាំងប្រទេសមានចំនួន ២ ៩២៤ គម្រោងដែលមានផ្ទៃក្រឡាកម្រាលសំណង់សរុបចំនួន ១២ ៣៣៥ ០៤៣ ម និងមានទុនវិនិយោគប្រមាណ ៥ ១០៩ ៤៧១ ០២៣ ដុល្លារអាមេរិក ក្នុងនោះមានជាអាទិ៍ គម្រោងអគារខ្ពស់ៗចាប់ពី ​៥ ជាន់ឡើងមានចំនួន ១៤៦ គម្រោង ស្មើនឹង ១៥៤ អគារ បុរីលំនៅឋាននិងបណ្ដុំលំនៅឋានមានលក្ខណៈជាបុរី​មានចំនួន ៧៩ គម្រោង ស្មើនឹង ១៨ ១៧៤ ខ្នង និងសំណង់អគារពហុមុខងារមានចំនួន ១៨ គម្រោង។

លោកបានបន្តថា ប្រសិនធ្វើការប្រៀបធៀបក្នុងរយៈពេលដូចគ្នាជាមួយឆ្នាំ២០២២ ឃើញថាមានទុនវិនិយោគមានការកើនឡើងទ្វេដង។

លោកបានបន្ថែមថា សមិទ្ធផលទាំងឡាយលើវិស័យសំណង់និងវិស័យផ្សេងៗនៅទូទាំងប្រទេស អាចកើតឡើងបាន ដោយសារតែប្រទេសមានសន្តិភាព ស្ថេរភាពនយោបាយ សន្តិសុខសង្គម ឯករាជ្យជាតិ ការធានានូវអធិបតេយ្យជាតិ និងស្ថេរភាព​ម៉ាក្រូសេដ្ឋកិច្ច ដែលផ្តល់នូវទំនុកចិត្តដល់វិនិយោគិនទាំងក្នុង និងក្រៅប្រទេស ក្នុងការជំរុញនូវការ អភិវឌ្ឍប្រទេស​ជាតិឲ្យបន្តរីកចម្រើនទៅមុខឥតឈប់ឈរលើគ្រប់វិស័យ ព្រមទាំងបន្តលើកកម្ពស់ជីវភាពរស់ នៅរបស់ប្រជាពលរដ្ឋ និងលើកស្ទួយកិត្យានុភាពជាតិនៅលើឆាកអន្តរជាតិ៕

អត្ថបទ៖ សំអឿន