ព័ត៌មានជាតិ

អាជ្ញាធរក្រុងកែប បញ្ជាឲ្យរុះរើជាបន្ទាន់ ចំពោះម្ចាស់បង្គោលរបងហ៊ុមព័ទ្ធរំលោភផ្លូវសាធារណៈ

បានផុស

១ year មុន

នៅ

ថ្ងៃព្រហស្បតិ៍ ៧ ធ្នូ ២០២៣

ដោយ

នៅថ្ងៃទី ៧ ខែធ្នូ ឆ្នាំ ២០២៣ នេះ អាជ្ញាធរក្រុងកែប ចេញបញ្ជាឲ្យម្ចាស់បង្គោលរបងដែលហ៊ុមព័ទ្ធរំលោភយកដីផ្លូវសាធារណៈ ស្ថិតក្នុងភូមិកែប សង្កាត់កែប ខេត្ត/ក្រុងកែប ត្រូវរុះរើចេញវិញជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈទំព័រហ្វេសប៊ុកផ្លូវការរបស់ លោក ខេង យ័ន អភិបាលក្រុងកែប បានឲ្យដឹងថា ចំពោះម្ចាស់បង្គោលរបងដែលហ៊ុមព័ទ្ធរំលោភយកដីផ្លូវសាធារណៈ ត្រូវរុះរើចេញវិញជាបន្ទាន់។ ករណីមិនអនុវត្ត រដ្ឋបាលក្រុងកែប នឹងចុះរុះរើ រួចដឹកយកមករក្សាទុកនៅសាលាក្រុងកែប ដោយមិនប្រគល់ជូនវិញនោះឡើយ ខណៈអាជ្ញាធរឲ្យម្ចាស់រុះរើចេញមុនថ្ងៃទី ១១ ខែធ្នូ ឆ្នាំ ២០២៣ ខាងមុខ។

លោក ខេង យ័ន បញ្ជាក់ថា នេះជាសកម្មភាពល្មើសច្បាប់ជាក់ស្ដែងអំពីការបំពានទ្រព្យសម្បត្តិ សាធារណៈរបស់រដ្ឋ។ ប៉ុន្តែរដ្ឋបាលក្រុងកែប បានទុកឱកាសដល់អ្នកប្រព្រឹត្តបទល្មើសក្នុងការមកដកចេញដោយខ្លួនឯង ដើម្បីយកបង្គោលរបងទៅប្រើប្រាស់សម្រាប់ដីកម្មសិទ្ធិខ្លួនវិញទៅ។ ក្នុងនោះ បើនៅតែរឹងទទឹង អាជ្ញាធរក្រុងកែប នឹងឲ្យក្រុមការងារចុះទៅរុះរើ នាថ្ងៃចន្ទ សប្ដាហ៍ក្រោយនេះហើយ ដោយមិនប្រគល់ជូនវិញនោះឡើយ។

ដោយឡែក ប្រជាពលរដ្ឋ ក៏បានលើកឡើងថា តើការសរសេរសារបង្ហោះរបស់ លោក ខេង យ័ន អភិបាលក្រុងកែប មានប្រសិទ្ធភាពដល់កម្រិតណាចំពោះអ្នករំលោភយកដីផ្លូវសាធារណៈមកធ្វើជាកម្មសិទ្ធិមួយកន្លែងនេះ៕

អត្ថបទ ៖ សឹង រ៉ាត់