លោក ឌិត ទីណា ៖ កម្មវិធី«កសិកម្ម វាលបៃតង» ជួយជំរុញពង្រីកទីផ្សារ និងលើកកម្ពស់ផលិតផលក្នុងស្រុក

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើក​ឡើង​ថា កម្មវិធី «កសិកម្ម វាល​បៃតង» ជួយ​ជំរុញ ពង្រីក​ទីផ្សារ និង​បង្ហាញ​ដល់​មិត្ត​ជា​ដៃគូ ក្នុង​ការ​អភិវឌ្ឍ​ឱ្យ​ឃើញ​នូវ​អ្វី​ដែល​បាន​រៀបចំ​ជា​ទម្រង់​ជាមួយ​គ្នា នាពេលកន្លងមក។

ការលើកឡើងនេះ ក្នុងឱកាស លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាព ក្នុងកម្មវិធី «កសិកម្ម វាល​បៃតង» សម្រាប់ឆ្នាំ ២០២៣ ដើម្បីបង្ហាញពីផលិតផលកសិកម្ម ដែលមានសក្ដានុពលរបស់កម្ពុជា នៅទីស្តីការក្រសួងកសិកម្ម កាលពីល្ងាចថ្ងៃទី ០៨ ខែធ្នូ ឆ្នាំ ២០២៣។

លោក ឌិត ទីណា លើកឡើងថា កម្មវិធី«កសិកម្ម វាល​បៃតង» ជាឱកាសដែលក្រសួងកសិកម្ម ចង់បង្ហាញ និងដាក់បង្គុំគ្នា រវាងអ្នកផលិតកសិផល និងកែច្នៃកសិផល ជាមួយនឹងអ្នកជំនួញផ្សេងៗ ដែលជួយជំរុញ និងពង្រីកទីផ្សារ និងបង្ហាញដល់មិត្ដជាដៃគូ ក្នុងការអភិវឌ្ឍ ឱ្យឃើញនូវអ្វីដែលបានរៀបចំជាទម្រង់ជាមួយគ្នា នាពេលកន្លងមក»។

លោក ឌិត ទីណា លើកឡើងបន្ថែមថា ការរៀបចំកម្មវិធី«កសិកម្ម វាល​បៃតង»នេះ ក្នុងគោលបំណងបង្ហាញរវាងអ្នកផលិតកសិផលកែច្នៃ ជាមួយអ្នកជំនួញផ្សេងៗ ដើម្បីជំរុញទីផ្សារ ក៏ដូចជាពង្រីកទីផ្សារ ឱ្យកាន់តែទូលំទូលាយថែមទៀត ហើយកម្មវិធីនេះ អាចនឹងធ្វើជារៀងរាល់ឆ្នាំ។

លោករដ្ឋមន្ត្រីក្រសួងកសិកម្ម ក៏បានគូសបញ្ជាក់ដែរថា ការតាំងបង្ហាញនេះ គឺជាការបង្ហាញនូវទំនិញនានា ដែលកើតចេញពីផលិតផលកសិកម្មនៅកម្ពុជា ដើម្បីឲ្យអ្នកចូលរួមបានស្គាល់ ងាយទំនាក់ទំនងគ្នា សម្រាប់ពង្រីកទីផ្សារ ឱ្យកាន់តែទូលំទូលាយទាំងក្នុងស្រុក ក៏ដូចជាក្រៅប្រទេសផងដែរ។

គួរជម្រាបថា កម្មវិធី «កសិកម្ម វាលបៃតង» នេះ ក៏មានការអញ្ជើញចូលរួមពី អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ភ្ញៀវកិត្តិយសជាតិ និងអន្តរជាតិ អង្គទូត និងតំណាងដៃគូអភិវឌ្ឍន៍ ព្រមទាំងមានការភ្លក្សម្ហូបអាហារផលិតពីផលិតផលខ្មែរ ដែលប្រកបដោយគុណភាព និងអនាម័យខ្ពស់ ថែមទៀតផង។

ជាងនេះទៅទៀត កម្មវិធី«កសិកម្ម វាលបៃតង»នេះ ក៏មានការរៀបចំបង្ហាញដល់ភ្ញៀវកិត្តិយសអំពីការដាល់អំបុក ដែលជាផ្នែកមួយ នៃវប្បធម៌ផ្សារភ្ជាប់នឹងវិស័យកសិកម្មដំណាំស្រូវ ក្រោយប្រមូលផល ផងដែរ៕

អត្ថបទ ៖ សួស សិត