ប្រធានសមាគម ៖ បច្ចុប្បន្នមគ្គទេសក៍ទេសចរណ៍ខេត្ត​សៀមរាប មានចំនួនជាង ៥ពាន់នាក់

បច្ចុប្បន្ននៅខេត្តសៀមរាប មានមគ្គទេសក៍ទេសចរចំនួនជាង ៥ពាន់នាក់ ក្នុងនោះស្រ្តីមានជាង ៣០ភាគរយ កំពុង​កម្រើការ​ងារក្នុងវិស័យទេសចរណ៍ និងបដិសណ្ឋារកិច្ច។ នេះបើតាមការបញ្ជាក់របស់លោក ខៀវ ធី ប្រធាសមាគម​មគ្គទេសក៍ទេសចរណ៍អង្គរ។

ថ្លែងប្រាប់កម្ពុជាថ្មី លោក ខៀវ ធី បានឱ្យដឹងថា ធនធានដែលកំពុងបម្រើការងារជាមគ្គទេសក៍ទេសចរណ៍​នៅខេត្តសៀមរាប មានចំណេះជំនាញត្រឹមត្រូវទាំងការធ្វើបដិសណ្ឋារកិច្ចរបស់ក្រុមហ៊ុនទីភ្នាក់ងារទេសចរណ៍ បុគ្គលិកនៅតាមសណ្ឋាគារ ផ្ទះសំណាក់ ភោជនីយដ្ឋាន ដោយមានភាពរាក់ទាក់ ទន់ភ្លន់ និងម៉ឺងម៉ាត់។ ចំពោះចំណេះដឹងទូទៅ មានការប្រើប្រាស់ភាសាបារាំង អង់គ្លេស និងភាសាដទៃទៀតបានល្អ ដោយមាន​ការសិក្សាស្រាវជ្រាវ ដើម្បីបន្ថែមចំណេះវិជ្ជាក្នុងការផ្សព្វផ្សាយ​ជូនដល់​ភ្ញៀវ​ទេសចរទាំងជាតិ និងអន្តរជាតិ នូវអ្វីដែលមាននៅកម្ពុជា ជាពិសេសនៅក្នុងខេត្តសៀមរាប។

លោកបានបន្ថែមដូច្នេះថា« មានការសរសេរ Feedback (មតិកែលម្អ) ពីភ្ញៀវទេសចរសរសើរ​ដល់មគ្គទេសក៍​ទេសចរកម្ពុជាច្រើន អំពីសេវាកម្ម និងការធ្វើបដិសណ្ឋារកិច្ច»។

ទោះយ៉ាងណា ប្រធានសមាគមមគ្គទេសក៍ទេសចរណ៍ ក៏បានស្នើដល់រដ្ឋាភិបាល ជួយបង្រឹងបើកវគ្គវិក្រឹត​ការបណ្តុះបណ្តាលធនធានមនុស្សផ្នែកមគ្គទេសក៍ទេសចរណ៍ តាមរយៈក្រសួងទេសចរណ៍បន្ថែមទៀត ដើម្បីបង្កើនចំណេះដឹងពង្រីកធនធាននៅទូទាំងប្រទេស ដែលជាផ្នែកមួយទាក់ទាញទេសចរផងដែរ។

សម្តេចនាយករដ្ឋមន្ត្រី ហ៊ុន ម៉ាណែត បានប្រកាសថា រាជរដ្ឋាភិបាលផ្តួចផ្តើមដាក់ចេញនូវកម្មវិធីពិសេសមួយ គឺ៖ «ទស្សនាសៀមរាប ឆ្នាំ ២០២៤» ដែលកម្មវិធីនេះ នឹងដាក់ចេញនូវវិធានការមួយចំនួន សំដៅជំរុញឱ្យវិស័យទេសចរណ៍​នៅក្នុងខេត្តសៀមរាប មានសន្ទុះងើបឡើងវិញ។

សូមបញ្ជាក់ថា ខេត្តសៀមរាប គឺជាខេត្តមួយដែលមានសក្ដានុពលទេសចរណ៍ដ៏សម្បូរបែប ដែលក្នុងនោះរួមមាន តំបន់ទេសចរណ៍បែបប្រវត្តិសាស្ត្រ តំបន់ទេសចរណ៍បែបធម្មជាតិ និងតំបន់ទេសចរណ៍បែបកែច្នៃ។ ជារៀងរាល់​ថ្ងៃសម្រាក ឬថ្ងៃបុណ្យទានផ្សេងៗ អ្នកទេសចរជាតិ និងអន្តរជាតិមួយចំនួន ចាត់ទុក​សៀមរាប ជាជម្រើសទីមួយ​នៅក្នុងការធ្វើដំណើរកម្សាន្ត។ សម្រាប់គោលដៅទេសចរណ៍សំខាន់ៗ រួមមាន ប្រាសាទអង្គរវត្ត ប្រាសាទបន្ទាយស្រី ប្រាសាទបាយ័ន ប្រាសាទព្រះខ័ន និងប្រាសាទបេងមាលាជាដើម៕