ស្ពានឫស្សីកោះប៉ែន កំពុងចាប់ផ្តើមសាងសង់ឡើងវិញ ខណៈទឹកទន្លេបន្តស្រក

ស្ពានឫស្សីកោះប៉ែន ជាស្ពានដ៏ទាក់ទាញមួយសម្រាប់ភ្ញៀវទេសចរក្នុងប្រទេស និងក្រៅប្រទេស មកលេងកម្សាន្តលើទឹកដីខេត្តកំពង់ចាម។ បច្ចុប្បន្ន ស្ពាននេះ ក្រុមការងារកំពុងតែសាងសង់ឡើងវិញ ស្របពេលទឹកទន្លេបន្តស្រកចុះ។

ជារៀងរាល់ឆ្នាំ ស្ពានឫស្សីកោះប៉ែននេះ ត្រូវបានសាងសង់រួចចុងខែវិច្ឆិកាមកម្ល៉េះ ប៉ុន្តែ ដោយសារទឹកទន្លេមេគង្គមានការស្រក់យឺត ទើបគេចាប់ផ្តើមសាងសង់នៅក្នុងដើមខែធ្នូវិញ។ ស្ពាននេះ មានប្រវែងជាង ៨០០ម៉ែត្រ ដោយមានទទឹង ១ម៉ែត្រកន្លះ ដែលចំណាយឬស្សីជាង២ម៉ឺនដើម។ លោក ប៊ុន ដារ៉ា ដែលជាម្ចាស់អភិរក្សស្ពានឫស្សីបានប្រាប់ឱ្យដឹងថា ស្ពានឫស្សីកោះប៉ែន កំពុងតែសាងសង់ជាបណ្តើរៗ ខណៈបច្ចុប្បន្នបាន៤០% ហើយ បើទោះបីទឹកទន្លេមេគង្គមានការស្រកចុះយឺតក៏ដោយ។ លោកបានបន្ថែមទៀតថា ឆ្នាំនេះ ការកសាងរមណីយដ្ឋានឆ្នេរខ្សាច់កោះប៉ែនឡើងវិញ មានការខុសប្លែកជាងរាល់ឆ្នាំ ពោល គឺមានផ្លូវចេញចូលធំទូលាយទាំងកន្លែងចំណតរថយន្តម៉ូតូ មានបង្គន់អនាម័យចល័ត មានពោងទឹកខ្នាតមធ្យមសម្រាប់ក្មេងលេង និងមានការរៀបចំគ្រែលំហែកាយ ដោយមានការកំណត់តារាងមុខម្ហូប និងសេវាកម្មផងដែរ។

គួរបញ្ជាក់ថា ស្ពានឫស្សីកោះប៉ែននេះ បានបង្ហាញភាពទាក់ទាញ និងសក្កានុពលយ៉ាងសំខាន់ លើវិស័យទេសចរណ៍ក្នុងខេត្តកំពង់ចាម ហើយក្នុងឆ្នាំនេះ មានលក្ខណ:ប្លែកជាងរាល់ឆ្នាំ គឺមានការពង្រីកឆ្នេរខ្សាច់ និងផ្លូវចេញចូលធំជាងមុន ដើម្បីសម្រួលចរាចរណ៍កុំឱ្យមានការកក់ស្ទះនាពេលបុណ្យទាន និងមួយវិញទៀតនោះ ខាងឆ្នេរខ្សាច់កោះប៉ែន ក៏មានបង្កើតស្តង់សម្រាប់ឱ្យអ្នកភូមិលើកោះនេះ បានលក់នំចំណីដែលផលិតផ្ទាល់តែម្តង៕

អត្ថបទ និង រូបភាព ៖  ឡេក ចាន់ពេជ្រ