លោក សំបូរ មាណ្ណារ៉ា៖ ការធ្វើសប្បុរសធម៌ ជាការរួមចំណែកមួយក្នុងការជួយប្រទេសជាតិ

លោក សំបូរ មាណ្ណារ៉ា សាស្ត្រាចារ្យផ្នែកប្រវត្តិសាស្រ្ត បានលើកឡើងថា ការធ្វើសប្បុរសធម៌ ជាការរួមចំណែកមួយក្នុងការជួយប្រទេសជាតិ ជាពិសេស ការជួយទៅដល់អ្នកដែលគ្មានលទ្ធភាពក្នុងការបន្តអភិវឌ្ឍសមត្ថភាពរបស់ខ្លួន។ លោក បានលើកឡើងបែបនេះ នៅក្នុងកិច្ចសម្ពាសជាមួយ«កម្ពុជាថ្មី» កាលពីពេលថ្មីៗនេះ។

សាស្ត្រាចារ្យផ្នែកប្រវត្តិសាស្រ្ត លោក សំបូរ មាណ្ណារ៉ា បានបញ្ជាក់ថា សម្តេចតេជោ ហ៊ុន សែន ជាគំរូមួយដ៏ប្រពៃនៃការធ្វើសកម្មភាពសប្បុរសធម៌ ព្រោះសម្តេច តែងតែជួយដល់អ្នកអ្នកដ៏ទៃដោយមិនចង់បានការតបស្នងមកវិញ ជាពិសេសអ្នកដែលជួបការលំបាក និងគ្មានលទ្ធភាពក្នុងការរៀនសូត្រជាដើម។ ជាក់ស្តែង កាលពីពេលថ្មីៗនេះ​ សម្តេច ​ហ៊ុន សែន បានជួយដល់សិស្សនិន្ទេសA មូយរូបដែលមានឳពុកម្តាយជាជនពិការ ហើយជួបការលំបាក ឱ្យបន្តការសិក្សានូវជំនាញដែលខ្លួនចង់រៀន ព្រមទាំងជួយជ្រុមជ្រែងដល់ក្រុមគ្រួសាររបស់គេថែមទៀត។ តាមរយៈការជួយទាំងអស់នេះ ធ្វើឱ្យគេមានឱកាសបង្កើននូវសមត្ថភាព ចំណេះ ជំនាញសកម្ម ដែលជាតិត្រូវការ និងបានរៀននូវជំនាញដែលគេចង់រៀន ដើម្បីបម្រើឱ្យផលប្រយោជន៍ជាតិ។ លោកថា សកម្មភាពទាំងអស់នេះ​ហើយដែលជាគំរូសម្រាប់ធ្វើកិច្ចការ ដើម្បីប្រទេសជាតិទាំងអស់គ្នា។

ជាមួយគ្នានេះ លោក សំបូរ មាណ្ណារ៉ា ក៏បានអំពាវនាវដល់អ្នកដែលមានទ្រព្យធន ធនធាន និងមានលទ្ធភាព ដែលអាចជួយដល់អ្នកដ៏ទៃបាន ទោះតិច ឬច្រើន សូមចូលរួមចំណែកជាមួយគ្នា ដើម្បីផ្សារភ្ជាប់ទស្សនៈនៃការអភិវឌ្ឍជាតិតាមរយៈការធ្វើសប្បុរសធម៌នេះ។ លោក​បន្ថែមថា ការធ្វើសប្បុរសធម៌​ ត្រូវធ្វើដើម្បីជាតិ កុំធ្វើដើម្បីតែផលប្រយោជន៍បុគ្គល បក្ខពួក ឬក្រុម ព្រោះសប្បុរសធម៌ពិតប្រាកដ មិនចង់បានអ្វីសម្រាប់ខ្លួនឯងវិញទេ គឺគិតគូរពីផលប្រយោជន៍សម្រាប់ជាតិទាំងមូល៕