លោក អូន ព័ន្ធមុនីរ័ត្ន ផ្តល់អាហារូបករណ៍ដល់​អ្នកចង់បម្រើការងារ​ក្នុងក្រសួងសេដ្ឋកិច្ច

លោកបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្តីក្រសួងសេដ្ឋកិច្ច និងហិរញ្ញវត្ថុ នឹងផ្តល់អាហារូបករណ៍ ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ដល់សិស្ស-និស្សិតដែលមានឪពុកម្តាយ ឬអាណាព្យាបាល កំពុងបម្រើការ​ងារនៅក្រសួងសេដ្ឋកិច្ច និងហិរញ្ញវត្ថុ ដើម្បីសិក្សានៅតាមបណ្តាគ្រឹះស្ថានសិក្សានានា ក្នុងឆ្នាំសិក្សា ២០២៤ ទៅតាម​មុខ​ជំនាញ និងគ្រឹះស្ថានសិក្សាដូចមានក្នុងឧបសម្ព័ន្ធភ្ជាប់ជូនជាមួយ។

ប្រភពពីក្រសួងសេដ្ឋកិច្ច បានបញ្ជាក់ថា ការផ្តល់អាហារូបករណ៍នេះ ក្នុងគោលបំណងចូលរួមចំណែកជាមួយ​រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស និងជួយសម្រាលបន្ទុកហិរញ្ញវត្ថុដល់មន្ត្រីបម្រើការងារ នៅក្រសួងសេដ្ឋកិច្ច និងហិរញ្ញវត្ថុ។

ដើម្បីទទួលបានអាហារូបករណ៍បេក្ខជននឹងត្រូវពិនិត្យ និងវាយតម្លៃនៃការជ្រើសរើស ផ្អែកលើលក្ខខណ្ឌ​ដែលបាន​កំណត់ក្នុងគោលការណ៍អាហារូបករណ៍របស់ លោកឧបនាយករដ្ឋមន្រ្តី។

ចំពោះការបំពេញនីតិវិធីចូលរៀនផ្សេងៗ របស់គ្រឹះស្ថានសិក្សាដែលបានជ្រើសរើស ជាកាតព្វកិច្ចរបស់បេក្ខជន​អាហារូបករណ៍។

សម្រាប់គ្រឹះស្ថានឧត្តមសិក្សាសហការផ្តល់អាហារូបករណ៍នេះ រួមមាន សាកលវិទ្យាល័យភូមិន្ទភ្នំពេញ សាកល​វិទ្យាល័យ​ភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច វិទ្យាស្ថានបច្ចេកវិទ្យាកម្ពុជា សាកលវិទ្យាល័យបច្ចេកវិទ្យា និងវិទ្យាសាស្រ្តកម្ពុជា វិទ្យាស្ថានពាណិជ្ជសាស្រ្តអេស៊ីលីដា សាកលវិទ្យាល័យអន្តរជាតិផារ៉ាហ្គន សាកលវិទ្យា​ល័យសេដ្ឋកិច្ច និងហិរញ្ញវត្ថុ វិទ្យាស្ថានវ៉ាន់ដា សាកលវិទ្យាល័យពុទ្ធិសាស្រ្ត និងសាកលវិទ្យាល័យបញ្ញាសាស្រ្តកម្ពុជា។

បើតាមក្រសួងសេដ្ឋកិច្ច បេក្ខជនដែលមានចំណាប់អារម្មណ៍ ត្រូវបំពេញពាក្យស្នើសុំអាហារូបករណ៍ នៅ”មជ្ឈមណ្ឌលអភិវឌ្ឍធុរកិច្ច” នៃក្រសួងសេដ្ឋកិច្ច និងហិរញ្ញវត្ថុ, ខណ្ឌជ្រោយចង្វារ, រាជធានីភ្នំពេញ៕