ពិធីបើកកម្មវិធី “ការបោះជំរំយុវជនជាសកល” លើកទី៩ ឆ្នាំ២០២៣ ធ្វើឡើងនៅខេត្តសៀមរាប

ពិធីបើកកម្មវិធី “ការបោះជំរំយុវជនជាសកល” លើកទី៩ ឆ្នាំ២០២៣ ត្រូវបានធ្វើឡើងនាល្ងាចថ្ងៃទី១២ ខែធ្នូ ឆ្នាំ២០២៣ ដែលមានបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រី្តក្រសួងអប់រំ យុវជន និងកីឡា ជាអធិបតីភាពនៅក្នុងពិធីនៅស្រុកបន្ទាយស្រី ខេត្តសៀមរាប ក្រោមប្រធានបទ “ការអភិវឌ្ឍយុវជនក្រោមដំបូលសន្តិភាព” ។

ការបោះជំរំយុវជនជាសកលលើកទី៩នេះ រៀបចំឡើងក្នុងគោលបំណង បង្ហាញពីដំណើរការនៃការអភិវឌ្ឍរបស់យុវជនកម្ពុជា ក្នុងបរិបទដែលប្រទេសជាតិទទួលបានសុខសន្តិភាពពេញលេញ ក៏ដូចជាចូលរួមលើកស្ទួយ និងផ្សព្វផ្សាយទេសចរណ៍ វប្បធម៌ អរិយធម៌ របស់ព្រះរាជាណាចក្រកម្ពុជាផងដែរ

នៅក្នុងពិធីបើកនេះ បណ្ឌិតសភាចារ្យឧបនាយករដ្ឋមន្ត្រី បានមានប្រសាសន៍ថា “យុវជនត្រូវទទួលបាននូវបរិបទសមស្រប ការវិនិយោគ ឱកាសចូលរួម និងការផ្តល់អំណាច ដែលអាចឱ្យយុវជនអភិវឌ្ឍន៍សក្តានុពលខ្លួនបានពេញលេញ ដើម្បីចូលរួមអភិវឌ្ឍន៍សង្គមជាតិលើគ្រប់វិស័យ  និងក្លាយទៅជាអ្នកដឹកនាំជាតិសំខាន់ៗនាពេលអនាគត ក្នុងដំណើរឈានទៅសម្រេចចក្ខុវិស័យកម្ពុជាឆ្នាំ២០៣០ និងឆ្នាំ២០៥០”។

បន្ថែមលើសពីនេះ បណ្ឌិតសភាចារ្យបានកោតសរសើរ និងវាយតម្លៃខ្ពស់ចំពោះក្រុមការងារទាំងអស់ ដែលបានបញ្ចេញអស់ពីកម្លាំងកាយ កម្លាំងចិត្ត រៀបចំការបោះជំរំយុវជនជាសកលលើកទី៩នេះឡើង ប្រកបដោយគុណភាព ក្នុងន័យលើកកម្ពស់គុណតម្លៃរបស់យុវជនក្នុងការអភិវឌ្ឍសង្គមជាតិ៕