វត្តមាននាវា Westerdam បានបង្ហាញពីការវិលត្រឡប់​នៃកំណើនភ្ញៀវទេសចរអន្តរជាតិ

ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្តគ្រឹស្នា បានលើកឡើងថា វត្តមានរបស់នាវាខ្នាតធំ Westerdam ចូលមកទឹកដីកម្ពុជាម្តងទៀតនេះ បានឆ្លុះបញ្ចាំងពីការវិលត្រឡប់នៃភ្ញៀវទេសចរអន្តរជាតិ ដែលជាយុទ្ធសាស្រ្តផ្សព្វផ្សាយរបស់ក្រសួងទេសចរណ៍។

រដ្ឋបាលខេត្តព្រះសីហនុ បានបញ្ជាក់ថា នាវា Westerdam នឹងដឹកភ្ញៀវទេសចរចម្រុះជាតិសាសន៍ប្រមាណ ១៥០០នាក់ ចូលខេត្តព្រះសីហនុ នៅថ្ងៃទី ២៨ ខែ ធ្នូ ឆ្នាំ ២០២៣។

លោក តាំង សុចិត្តគ្រឹស្នា បានប្រាប់កម្ពុជាថ្មីថា តាមការគ្រោងទុកភ្ញៀវទេសចរអន្តរជាតិទាំងអស់នោះ នឹងធ្វើដំណើរ​កម្សាន្តនៅក្នុងខេត្តព្រះសីហនុ នៅតាមតំបន់ឆ្នេរ ទីវត្តអារាម ផ្សារ សាលារៀន និងហូសទៅរាជធានីភ្នំពេញ កំពត និងខេត្តសៀមរាប ផងដែរ។ បើតាមប្រធានមន្ទីរទេសចរណ៍ខេត្តព្រះសីហនុ មុននឹងនាវាទេសចរណ៍អន្តរជាតិ សម្រេច​ចិត្តថា លក់កញ្ចប់ទេសចរណ៍ឱ្យភ្ញៀវអន្តរជាតិ ទៅលេងកម្សាន្តប្រទេសណាមួយនោះ គេតែងតែសិក្សាពីតំបន់​ទេសចរណ៍ ភាពទាក់ទាញ ជាពិសេសសន្តិសុខសុវត្ថិភាព ដែលក្នុងនោះ កម្ពុជាស្ថិតនៅក្នុងគោលដៅដែលភ្ញៀវទេសចរ​អន្តរជាតិ​ចាប់អារម្មណ៍ និងមានសុវត្ថិភាពល្អ។

លោក ឡុង ឌីម៉ង់ អភិបាលរងខេត្តព្រះសីហនុ បានឱ្យដឹងថា រដ្ឋបាលខេត្តព្រះសីហនុ បាននិងកំពុងត្រៀមរៀបចំ​ការទទួលភ្ញៀវទេសចរអន្តរជាតិផង និងរំឮករយៈពេល ៣ឆ្នាំ នៃការចូលសំចតរបស់នាវា Westerdam កាលពីឆ្នាំ ២០២០ គ្រាដែលប្រទេសជាច្រើនបានបដិសេធមិនអនុញ្ញាតឱ្យនាវានេះចូលចត នៅអំឡុងវិបត្តិកូវីដ-១៩ ផ្ទុះឆ្លងរាល​ដាលខ្លាំង ប៉ុន្តែបែរជាកម្ពុជា អនុញ្ញាតឱ្យនាវានេះចូលចត ដែលធ្វើឱ្យមានការភ្ញាក់ផ្អើលទូទាំងពីភពលោក។

បើតាមលោក ឡុង ឌីម៉ង់ ព្រឹត្តិការណ៍នាពេលនោះ បានបញ្ជាក់ថា កម្ពុជា ជាប្រទេសតូចតែមានបេះដូងធំ បើទោះជាប្រឈមនឹងការឆ្លងពីជំងឺរាតត្បាតដ៏កាចសាហាវ តែសម្តេចតេជោ អតីតនាយករដ្ឋមន្រ្តី នៅតែមាន​សណ្តានចិត្តមនុស្សធម៌ជួយដល់ភ្ញៀវទេសចរអន្តរជាតិ ដែលកំពុងជាប់គាំងនៅលើនាវាទាំងអស់នោះ ដើម្បី​ឱ្យពួកគេបានវិលត្រឡប់ទៅប្រទេសកំណើតវិញ តាមមធ្យោបាយរៀងៗខ្លួន។

ព្រឹត្តិការណ៍ទាំងអស់នេះហើយ ដែលធ្វើឱ្យនាវាខ្នាតយក្ស Westerdam នៅតែចងចាំមិនភ្លេច និងចិញ្ចឹមចិត្តដឹក​នាំភ្ញៀវទេសចរអន្តរជាតិចូលមកកម្សាន្តនៅកម្ពុជា ជាថ្មីម្តងទៀត។ លោកអភិបាលរងខេត្តព្រះសីហនុ មើលឃើញថា នេះក៏ឱកាសឱ្យកម្ពុជា បានបង្ហាញពីសក្តានុពលទេសចរណ៍ និងវិនិយោគរបស់កម្ពុជា ជាពិសេសនៅខេត្តព្រះសីហនុ ក្រោយវិបត្តិកូវីដ-១៩។

ជាមួយគ្នានេះ លោក ឡុង ឌីម៉ង់ បានបញ្ជាក់ថា អាជ្ញាធរ បាននិងកំពុងរៀបចំសន្តិសុខ សណ្តាប់ធ្នាប់សាធារណៈ ការរក្សា​អនាម័យបរិស្ថាន និងដាក់តាំងបង្ហាញរូបភាពពីតំបន់ទេសចរណ៍សំខាន់ៗផងដែរ។

សូមបញ្ជាក់ថា នាវា Westerdam នឹងចូលកម្ពុជា ពេញមួយថ្ងៃទី ២៨ ខែធ្នូ ដោយគ្រោងមកដល់ខេត្តព្រះសីហនុ នៅម៉ោង ៨ព្រឹក និងចាកចេញពីកម្ពុជាវិញ នៅយប់ថ្ងៃដដែលនេះ៕