ពលរដ្ឋស្រុកសេសាន​ ដឹងគុណ​អតីតនាយករដ្ឋមន្ត្រី ផ្តល់ស្ពាន​បេតុងថ្មី

ប្រជាពលរដ្ឋក្នុងស្រុកសេសាន្ត​បានសម្ដែងការដឹងគុណចំពោះសម្តេច​តេជោ ហ៊ុន សែន អតីតនាយករដ្ឋមន្ត្រីកម្ពុជា ដែល បានជូនជាចំណងដៃ នូវស្ពានបេតុងថ្មីមួយទៀតនៅឃុំសាមឃួយ ​ស្រុកសេសាន ខេត្តស្ទឹងត្រែង បច្ចុប្បន្នបានសាងសង់រួចរាល់ និងបើកឱ្យប្រជាពល​ឆ្លងកាត់។

​លោក ស គឹមណាត ប្រធានមន្ទីរសាធារណៈការ និងដឹកជញ្ជូនខេត្តស្ទឹងត្រែងបានឱ្យដឹងថា ស្ពានបេតុង​ថ្មីនេះ ជាអំណោយរបស់សម្តេចអគ្គមហាសេនាបតីតេជោ ហ៊ុន សែន និងជាស្ពានទី៨ នៅតាម​បណ្តោយផ្លូវជួរមាត់ទន្លេទៅកាន់ទំនប់វារីអគ្គិសនីសេសានក្រោម២ ដែលសម្តេចបានផ្តល់ជូនជាចំណងដៃដល់ប្រជាពលរដ្ឋកាលពីអាណត្តិទី៦ ហើយក្រុមផ្នែកបច្ចេកទេសទើបបញ្ជាប់​ការសាង​សង់រួចរាល់នៅក្នុងខែធ្នូ ឆ្នាំ ២០២៣នេះ។

​លោកបន្តថា សមិទ្ធផលផ្លូវស្ពានទាំងអស់នេះមានតម្លៃ រាប់ពាន់លានរៀល ដូចនេះអាជ្ញាធរ​ និង​ប្រជាពលរដ្ឋនៅក្នុងមូលដ្ឋាន ត្រូវរួមគ្នាជួយថែរក្សា ដើម្បីបម្រើផលប្រយោជន៍រួមទាំងអស់គ្នា។

លោកស្រី ត្រែ ដាវណ្ណ រស់នៅឃុំសាមឃួយ បានចាត់ទុកថា៖ នេះជាសារមួយបានដាស់តឿនដល់អ្នកប្រើប្រាស់ផ្លូវ ជាពិសេសអ្នកមានរថយន្តធំៗដឹកទំនិញ សូមឱ្យគោរពតាមការណែនាំ ដើម្បីយើងចូលរួមជួយថែរក្សាផ្លូវស្ពានទាំងអស់គ្នា។

លោកស្រីបន្តថា៖ ប្រជាពលរដ្ឋនៅស្រុកសេសាន ទទួលបានសមិទ្ធផលផ្លូវស្ពានថ្មីៗ ពីសម្តេចតេជោ ស្រួលក្នុងការធ្វើចរាចរណ៍ទៅមកទាំងអស់គ្នា មិនលំបាកវាងឆ្ងាយទៀតទេ។

លោកស្រី ខាវ ខាំអន មេឃុំសាមឃួយបានបញ្ជាក់ថា៖ ភាពលំបាកនេះត្រូវបានលុបបំបាត់ជំនួសមកវិញនូវភាពងាយស្រួលសប្បាយរីករាយ បងប្អូនស្រួលធ្វើចរាចរណ៍ទៅមក ដឹកកសិផលបានឆាប់លឿន កូនចៅទៅរៀនបានទាន់ពេលវេលា ឈឺថ្កាត់ទៅមន្ទីរពេទ្យក៏បានឆាប់រហ័សផងដែរ។     

ស្ពានអូរសាមឃួយនេះមានប្រវែងបណ្តោយ ៤៨ម៉ែត្រ ទទឹង៨ម៉ែត្រ បានសាងសង់ឡើងដោយក្រុមបច្ចេកទេស របស់មន្ទីរសាធារណៈការ និងដឹកជញ្ជូនខេត្ត កាលពីខែមីនា ហើយបានរួចរាល់ជាផ្លូវការ នៅដើមខែ ធ្នូ ឆ្នាំ២០២៣នេះ និងបានបើកឱ្យប្រជាពលរដ្ឋយើងធ្វើចរាចរណ៍ឆ្លងកាត់ហើយ និងមានភាពងាយស្រួលសម្រាប់ភ្ញៀវទេសចរ ទៅកាន់រមណី​យដ្ឋាននានាក្នុងស្រុកសេសាន្តផងដែរ៕

អត្ថបទ៖ ងិនលីម