មន្ត្រីរាជរដ្ឋាភិបាល ផ្ដាំអ្នកវិភាគគួរតែមានគោល ការណ៍ «ខួរក្បាលធំជាងអណ្ដាត» មុននិយាយអ្វី មួយ

លោក តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រីនៃរាជរដ្ឋាភិបាលកម្ពុជា បានផ្ដាំទៅអ្នកវិភាគទាំងអស់គួរតែប្រកាន់យកនូវគោលការណ៍ «ខួរក្បាលធំជាងអណ្ដាត» មុននឹងនិយាយអ្វីមួយដែលពាក់ព័ន្ធនឹងផលប្រយោជន៍ជាតិ។

ការផ្ដាំផ្ញើទៅកាន់ក្រុមអ្នកវិភាគបែបនេះ ដោយហេតុលោកព្រួយបារម្ភថា រាល់ការវិភាគរបស់អ្នកទាំងនោះ អាចបង្កជា ផលប៉ះពាល់ដល់ផលប្រយោជន៍រួមរបស់ជាតិ ជាពិសេសប៉ះពាល់ដល់សន្តិសុខ សណ្ដាប់ធ្នាប់ និងការសម្ងាត់ជាតិ។

ក្នុងសន្និសីទសារព័ត៌មាន នាយប់ថ្ងៃទី១២ ខែធ្នូ ឆ្នាំ២០២៣ ស្ដីពីដំណើរទស្សនកិច្ចរបស់សម្ដេចធិបតី ហ៊ុន ម៉ាណែត នៅប្រទេសវៀតណាម លោក តាន់ ហ្សង់ហ្វ្រង់ស័រ បានថ្លែងដូច្នេះថា «ខ្ញុំចង់ផ្ដាំផ្ញើទៅបងប្អូនអ្នកវិភាគទាំងអស់ ខ្ញុំហៅ បងប្អូន ព្រោះខ្ញុំនិយាយក្នុងនាមភាតរភាព ខ្ញុំនិយាយក្នុងនាមមិត្តភាព ខ្ញុំនិយាយក្នុងនាមខ្មែរដូចគ្នា ថា បើសិនយើងចង់ឃើញកម្ពុជាទាញយកប្រយោជន៍ពីទំនាក់ទំនងអន្តរជាតិរវាងបណ្ដាប្រទេសជិតខាងកម្ពុជា រវាងបណ្ដាប្រទេសក្នុងតំបន់ លើឆាកតំបន់​ ឬលើឆាកអន្តរជាតិ ម្នាក់ៗទាំងអ្នកចេះដឹង ទាំងសាមញ្ញជនធម្មតា ទាំងពលរដ្ឋខ្មែរធម្មតា គួរតែប្រកាន់គោលការណ៍មួយ នោះធ្វើយ៉ាងណាគួរតែមានខួរក្បាលធំជាងអណ្ដាត»។

ការស្នើឱ្យអ្នកវិភាគប្រកាន់យកគោលការណ៍ «ខួរក្បាលធំជាងអណ្ដាត» នេះ គឺលោក ហ្សង់ហ្វ្រង់ស័រ ចង់បញ្ជាក់ថា នៅលើឆាកតំបន់ ក៏ដូចជានៅលើឆាកនយោបាយអន្តរជាតិ មិនអាចនិយាយអ្វីស្រេចតែចិត្តចង់និយាយនោះទេ ពីព្រោះការលើកឡើងខ្លះអាចប៉ះពាល់ដល់ផលប្រយោជន៍របស់ជាតិ ពោល គឺប៉ះពាល់ដល់រឿងសម្ងាត់របស់ជាតិ និងរឿងសន្តិសុខរបស់ជាតិ ជាដើម៕