ពិព័រណ៍សៀវភៅកម្ពុជា លើកទី១០ ឆ្នាំ២០២៣ មានអ្វីប្លែក?

កម្មវិធីពិព័រណ៍សៀវភៅកម្ពុជា លើកទី១០ ដែលរៀបចំធ្វើឡើងចាប់ពីស្អែកនេះ កាន់តែប្លែកជាងឆ្នាំកន្លង ដោយឆ្នាំនេះ ក្រោមការដឹកនាំក្រសួងវប្បធម៌ និងវិចិត្រសិល្បៈ សហការជាមួយ ក្រសួងអប់រំ យុវជន​ និងកីឡា និងក្រសួង-ស្ថាប័នពាក់ព័ន្ធ បានសម្រេចរៀបចំឱ្យកាន់តែអស្ចារ្យជាងបណ្តាឆ្នាំមុនៗ ទាំងពេលវេលា ទីតាំង ចំនួនស្តង់ ការប្រគុំតន្ត្រី និងកម្មវិធីពិសេសៗជាច្រើនពីម្ចាស់ស្តង់ជាដើម។

បើធៀបនឹងពិព័រណ៍សៀវភៅកម្ពុជាលើកទី៩ ពិព័រណ៍សៀវភៅឆ្នាំ២០២៣ បានផ្លាស់មកធ្វើនៅទីតាំងធំជាងមុន ក្នុងបរិវេណសួនអគារ City Hall កោះពេជ្រ រយៈពេលយូរជាងមុនដល់ទៅ ៤ថ្ងៃ ពោលចាប់ពីថ្ងៃទី១៤ ដល់ថ្ងៃទី១៧ ធ្នូ ឆ្នាំ២០២៣ ។

លើសពីនេះ ចំនួនស្តង់នៃការចូលរួមសម្រាប់ឆ្នាំនេះ បានកើនឡើងខ្លាំងគួរឱ្យកត់សម្គាល់ ដែលមានរហូតដល់ជាង ៣០០ស្តង់ បើធៀបនឹងឆ្នាំមុន មានជិត ២០០ស្តង់ប៉ុណ្ណោះ។ ឯពេលវេលា បើតាមអ្នករៀបចំការតាំងពិព័រណ៍នេះ បញ្ជាក់ថា ដើម្បីសម្រួលដល់អ្នកចូលរួម ដែលរវល់នឹងកិច្ចការងារ ក៏ដូចជាការសិក្សា អាចចូលរួមបន្ទាប់ពីបញ្ចប់ភារកិច្ចបាន ឆ្នាំនេះ ពិព័រណ៍សៀវភៅកម្ពុជា បានរំកិលពេលចាប់ផ្តើមនៅម៉ោង ៨ព្រឹក ដល់ ម៉ោង ៨យប់វិញ (ឆ្នាំមុន ម៉ោង ៧ព្រឹក-៧យប់) និងមានការប្រគុំតន្ត្រី ដែលរៀបចំឡើងនៅទីតាំងបរិវេណពិព័រណ៍ផងដែរ។

អ្វីដែលកាន់តែពិសេសថែមទៀត​ គឺពិព័រណ៍សៀវភៅលើកនេះ ធ្វើឡើងដំណាលគ្នានឹងការតាំងពិព័រណ៍របស់ ក្រសួងពាណិជ្ជកម្ម គ្រាន់តែចាប់ផ្តើម មុនក្រោយគ្នាមួយថ្ងៃប៉ុណ្ណោះ។

សូមជម្រាបថា ពិព័រណ៍សៀវភៅកម្ពុជាឆ្នាំនេះ ក្រោមប្រធានបទ “សរសេរចំណាន អានចំណាប់ ចាប់យកចំណេះ” ដោយមានការចូលរួមពី សមាគម ម្ចាស់ក្រុមហ៊ុន និងអ្នកនិពន្ធជាច្រើន និងមានកម្មវិធីពិសេស ក៏ដូចជាការផ្តល់ជូន ពីបណ្តាស្តង់ជាច្រើនផងដែរ៕