អូស្រ្តាលីរៀបចំវគ្គបណ្តុះបណ្តាលស្តីពី ការប្រើប្រាស់ដ្រូនសម្រាប់ការបាញ់ថ្នាំកសិកម្មនៅកម្ពុជា

អូស្ត្រាលី បានរៀបចំវគ្គបណ្តុះបណ្តាលស្តីពី ការប្រើប្រាស់ដ្រូនសម្រាប់ការបាញ់ថ្នាំកសិកម្មនៅកម្ពុជា។ នេះបើតាមការផ្សព្វផ្សាយរបស់ស្ថានទូតអូស្រ្តាលីប្រចាំកម្ពុជា នៅថ្ងៃទី១៤ ខែធ្នូ ឆ្នាំ២០២៣នេះ។

បើតាមស្ថានទូតអូស្ត្រាលីប្រចាំកម្ពុជា បង្គំបច្ចេកទេសគ្រប់គ្រងស្មៅចង្រៃ ដើម្បីជួយអភិវឌ្ឍន៍វិស័យកសិកម្មនៅកម្ពុជា តាមរយៈគម្រោងរបស់មជ្ឈមណ្ឌលស្រាវជ្រាវកសិកម្មអន្តរជាតិរបស់ប្រទេសអូស្ត្រាលី។

ដោយឡែក ថ្មីៗនេះ មានកិច្ចសហការរវាងសាកលវិទ្យាល័យ Queensland ប្រទេសអូស្រ្តាលី និងវិទ្យាស្ថាន CARDI បានធ្វើការបណ្តុះបណ្តាលដល់អ្នកផ្តល់សេវាកម្មដ្រូន សម្រាប់ការបាញ់ថ្នាំកសិកម្មដើម្បីលើកកម្ពស់ប្រសិទ្ធភាព និងសុវត្ថិភាព ក្នុងការប្រើប្រាស់ថ្នាំពុលកសិកម្មនៅខេត្តព្រៃវែង និងខេត្តតាកែវ។

តាមរយៈវគ្គបណ្តុះបណ្តាលនេះ អ្នកផ្តល់សេវាកម្មដ្រូន មន្រ្តីកសិកម្ម និងកសិករបានរៀនសូត្រពីបច្ចេកវិទ្យាដ្រូន និងបង្កើនចំណេះដឹងក្នុងការគ្រប់គ្រងស្មៅចង្រៃដើម្បីធ្វើការកំចាត់ស្មៅប្រកបដោយប្រសិទ្ធិភាពនៅក្នុងផលិតកម្មស្រូវនៅកម្ពុជាផងដែរ៕