រដូវប្រមូលផលតម្លៃដំឡូងមីនៅខេត្តព្រះវិហារមានទីផ្សារល្អជាងមុន

សហគមន៍កសិកម្មចំនួន ១០ ក្នុងខេត្តព្រះវិហារនៅថ្ងៃទី ១៤ ខែធ្នូ ឆ្នាំ ២០២៣នេះ បានប្រមូលផលដំឡូងមីសរីរាង្គលក់ឱ្យក្រុមហ៊ុន សាជីវកម្មសហគមន៍កសិកម្មកម្ពុជា (CACC) តាមកិច្ចសន្យាលើបរិមាណ ៦ ម៉ឺនតោន ដែលមាន​ក្រុមកសិករអ្នកផលិតចំនួន ១ ៤១២ គ្រួសារ បានចុះកិច្ចសន្យារួមគ្នា​តាមរយៈ​សហគមន៍កសិកម្ម​ពួគេ លក់ដំឡូងមីជូនក្រុមហ៊ុនខាងលើ។

លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ មានប្រសាសន៍ថា ​ស្ថានភាពទីផ្សារដំឡូង​មីនៅខេត្តព្រះវិហារឆ្នាំនេះ មានភាពល្អប្រសើរជាងឆ្នាំមុនបន្តិចនារដូវ​ប្រមូល​ផលនេះ ​ដោយសារទីផ្សារអន្តរជាតិ​មានភាពល្អប្រសើរ ដែលធ្វើឱ្យដំឡូងមីក្នុង​ស្រុក​ក៏ឡើងថ្លៃដែរ។

តម្លៃដំឡូងមីក្នុងខេត្តព្រះវិហារ នៅថ្ងៃទី ១៤ នេះ លក់បាន ៣៧០ ទៅ ៣៨០ រៀល/គីឡូក្រាម។ ប៉ុន្តែនៅខេត្តឧត្តរមានជ័យ តម្លៃធ្លាក់ចុះមកនៅត្រឹមតែ ៣២០ រៀល/គ.ក។

លោក អិល ឈិញ ប្រធានសមាគមកសិករដំឡូងមីខ្មែរ តម្លៃខុសគ្នាដោយសារនៅខេត្តព្រះវិហារ​ដីមានជីជាតិល្អ ព្រមទាំងការជ្រើសរើសពូជបានល្អ ខុសពីខេត្តឧត្តរមានជ័យដាំពូជចម្រុះ។

ខេត្តព្រះវិហារ មានផ្ទៃដីដាំដំឡូងមី ប្រមាណ ៣ ម៉ឺនហិកតា ដែលទទួលបានទិន្នផលប្រមាណ ៧០ ម៉ឺនតោន ក្នុង១ឆ្នាំ៕

អត្ថបទ៖ ឡេង ដេត