ក្រសួងកិច្ចការនារី និងWedu ផ្តល់អាហារូបករណ៍ ៥ពាន់ដុល្លារដល់សិស្សស្រីចង់បន្តការសិក្សា

ក្រសួងកិច្ចការនារី និងអង្គការ Wedu កំពុងប្រកាសផ្តល់នូវអាហារូបករណ៍មូលនិធិសិក្សារហូតដល់៥ ០០០ដុល្លារ សម្រាប់សិស្សស្រីក្នុងកម្មវិធី “ផ្តល់ហិរញ្ញប្បទានសម្រាប់ការវិនិយោគដល់ការអប់រំរបស់ស្ត្រ”។ នេះបើតាមការផ្សព្វផ្សាយរបស់ក្រសួងកិច្ចការនារី នៅថ្ងៃទី១៥ ខែធ្នូនេះ។

សម្រាប់ការផ្តល់អាហារូបករណ៍នេះ នឹងផ្តល់ឱ្យនូវមធ្យោបាយសម្រាប់ស្ត្រីដែលចង់បានការផ្លាស់ប្តូរ និងចង់បន្តការសិក្សារបស់ខ្លួនតាមក្តីស្រមៃ បន្ទាប់ពីបញ្ចប់ការសិក្សាកម្រិតមធ្យមសិក្សាទុតិយសភូមិ។ បន្ថែមពីនេះ ក៏ចូលរួមចំណែកក្នុងការលើកកម្ពស់ចំណេះដឹង និងការទទួលបានការងារសមរម្យសម្រាប់ជំរុញភាពជាអ្នកដឹកនាំរបស់ស្ត្រីនាពេលអនាគត។

ក្រសួងកិច្ចការនារីបានបញ្ជាក់ថា នេះ គឺជាកម្មវិធីមួយដែលស្ថិតនៅក្នុងគម្រោងស្តីពី ការបើកគន្លឹះភាពជាអ្នកដឹកនាំរបស់ស្រ្តី ដែលមានការចុះអនុស្សារណៈយោគយល់រវាងក្រសួងកិច្ចការនារី និងអង្គការ Wedu Cambodia តាំងពីឆ្នាំពី២០១៩មក។

សូមជម្រាប់ថា ស្រ្តីដែលអាចដាក់ពាក្យបាន គឺស្ត្រីមកពីប្រទេសចំនួន១៩ មានដូចជា៖ ប្រទេសអាហ្វហ្គានីស្ថាន បង់ក្លាដែស ប៊ូតាន ប្រុយណេ កម្ពុជា ឥណ្ឌា ឥណ្ឌូណេស៊ី ឡាវ ម៉ាឡេស៊ី ម៉ាល់ឌីវ មីយ៉ាន់ម៉ា នេប៉ាល់ ប៉ាគីស្ថាន ហ្វីលីពីន សិង្ហបុរី ស្រីលង្កា ថៃ ទីម័រខាងកើត និងវៀតណាម។ សម្រាប់ព័ត៌មានកម្អិត លក្ខខណ្ឌ និងការដាក់ពាក្យដើម្បីទទួលបានអាហារូបករណ៍ អ្នកសិក្សាអាចចូលមើលតាមតំណភ្ជាប់នេះ (https://www.weduglobal.org/educationfunding/)៕