​កោតសរសើរទឹកចិត្តអ្នកនេសាទមួយរូបលែងត្រីរាជ១ក្បាល​ទម្ងន់ជាង ១០០ គីឡូក្រាម​ចូលទន្លេវិញ

ត្រីរាជ១ ក្បាលទម្ងន់ ១១៥ គីឡូក្រាម ប្រវែង ២,២ ម៉ែត្រ ​ត្រូវបានព្រលែងចូលទន្លេវិញ ក្នុងឃុំកំពង់ហ្លួង ស្រុកពញាឮ ខេត្តកណ្ដាល។

រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានកោតសរសើរ ចំពោះលោក ម៉ុត សាវឿន ដែលបានលែងត្រីរាជ១ក្បាល ទម្ងន់១១៥គីឡូក្រាម ប្រវែង២,២ម៉ែត្រ ចូលក្នុងទន្លេសាប​វិញ ក្នុងឃុំកំពង់ហ្លួងស្រុកពញាឮ ខេត្តកណ្តាល បន្ទាប់ពីនេសាទបាននាថ្ងៃទី១៤ ខែធ្នូ ឆ្នាំ២០២៣។

សកម្មភាពនេះ គឺជាគំរូដ៏ល្អ និងមានតម្លៃមិនអាចកាត់ថ្លៃបានក្នុងការរួមចំណែកថែរក្សា ការពារ និង​អភិរក្សប្រភេទត្រីដែលជិតផុតពូជ។ ​

​រដ្ឋបាលជលផលក៏បានអំពាវនាវដល់បងប្អូនអ្នកនេសាទ ឱ្យចូលរួមថែរក្សា ​និងការពារប្រភេទត្រីដែលជិតផុតពូជ ដោយលែងចូលក្នុងដែនទឹកធម្មជាតិវិញនៅពេលនេសាទបាន ដើម្បីថែរក្សាវត្តមានរបស់ប្រភេទត្រីទាំងនេះឱ្យសំបូរ សម្រាប់កូន​ចៅជំនាន់ក្រោយ៕