ព័ត៌មានជាតិ

សួនមេអំបៅ នៅឧទ្យានជាតិកែប បន្តដំណើរការទទួលភ្ញៀវទេសចរចូលទស្សនា ដោយឥតគិតថ្លៃ

បានផុស

១០ ខែ មុន

នៅ

ថ្ងៃសុក្រ ១៥ ធ្នូ ២០២៣

ដោយ

តំបន់សួនមេអំបៅនៅឧទ្យានជាតិកែប នៅតែដំណើរការបើកទ្វារទទួលភ្ញៀវទេសចរជាតិ-អន្តរជាតិ ឲ្យចូលទស្សនាលេងកម្សាន្តដោយឥតគិតថ្លៃ។ នេះបើយោងតាម អ្នកស្រី ពេជ្រ ស៊ីនួន អ្នកមើលការខុសត្រូវ សួនមេអំបៅ បានឲ្យដឹង នៅថ្ងៃទី ១៥ ខែធ្នូ ឆ្នាំ ២០២៣ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ពេជ្រ ស៊ីនួន អ្នកមើលការខុសត្រូវ សួនមេអំបៅ បានប្រាប់ឲ្យដឹងថា សួនមេអំបៅនេះ មានទីតាំងនៅជាប់ជ្រលងភ្នំ នៃឧទ្យានជាតិកែប ស្ថិតក្នុងភូមិកែប សង្កាត់កែប ក្រុង/ខេត្តកែប ដោយបានចាប់ផ្ដើមដំណើរការក្នុងឆ្នាំ ២០១៣ មកម្ល៉េះ។

អ្នកស្រី ពេជ្រ ស៊ីនួន បានបន្តថា បន្ទាប់ពីមានការផ្ទុះជំងឺកូវីដ-១៩ រហូតមកដល់បច្ចុប្បន្ន សួនមេអំបៅ ដែលជាគោលដៅទេសចរណ៍មួយនៅខេត្តកែប ហាក់ស្ងប់ស្ងាត់ភ្ញៀវទៅទស្សនា។ តែទោះជាយ៉ាងណាក៏ដោយ បើតាមការបញ្ជាក់របស់អ្នកគ្រប់គ្រង ថា សួនមេអំបៅ មិនទាន់មានគម្រោងថាបិទនៅឡើយទេ គឺនៅតែបើកទ្វារទទួលទេសចរឲ្យចូលទស្សនាដោយឥតគិតថ្លៃដដែល ម្យ៉ាងកន្លែងនេះមិនបានបើកដើម្បីស្វែងរកប្រាក់ចំណូលពីភ្ញៀវឡើយ។

អ្នកស្រី ពេជ្រ ស៊ីនួន បានបន្តទៀតថា សួនមេអំបៅក្នុងតំបន់ឧទ្យានជាតិកែប គឺជាគោលដៅទេសចរណ៍ដ៏ទាក់ទាញមួយរបស់ខេត្តកែប នៅទីនោះមានដាំដើមផ្កាស្រុក និងផ្កាឈើព្រៃជាច្រើនប្រភេទ មានសួនចិញ្ចឹមសត្វមេអំបៅ មានខ្ចុះ និងទោងសម្រាប់អង្គុយលេង មានកន្លែងថតរូបអនុស្សាវរីយ៍ជាដើម ហើយការចូលទៅទស្សនាឥតគិតថ្លៃនោះឡើយ។

អ្នកស្រី បន្ថែមថា ដំបូងឡើយ សួនមេអំបៅ មានចិញ្ចឹមសត្វមេអំបៅប្រមាណ ១៩ ប្រភេទ ប៉ុន្តែបច្ចុប្បន្ននៅសល់តែ ៦ ឬ ៧ ប្រភេទប៉ុណ្ណោះ ដោយសារការបាត់បង់ធនធានធម្មជាតិតាមរយៈការឈូសឆាយដីភ្នំ និងការកាប់ព្រៃឈើ ដើម្បីធ្វើការអភិវឌ្ឍន៍ផ្សេងៗ ជាដើម…។

អ្នកស្រី បញ្ជាក់ថា សួនមេអំបៅ ជាគោលដៅទេសចរណ៍ដ៏ទាក់ទាញមួយ កាលពីមុន ទាំងភ្ញៀវជាតិ និងអន្តរជាតិ តែងចូលមកទស្សនាហូរហែមិនដាច់ទេ ដោយសារមិនតម្រូវឲ្យបង់ថ្លៃ ឬទិញសំបុត្រនោះឡើយ។ ក្នុងនោះដែរ ក្រោយពេលផ្ទុះជំងឺកូវីដ-១៩ រហូតមកដល់បច្ចុប្បន្ន សួនមេអំបៅ ហាក់នៅស្ងប់ស្ងាត់ភ្ញៀវមកទស្សនា។

អ្នកស្រី បញ្ជាក់ទៀតថា សួនមេអំបៅ មិនទាន់មានគម្រោងបិទនៅឡើយទេ គឺនៅតែបើកទ្វារទទួលទេសចរឲ្យចូលទស្សនាដោយឥតគិតថ្លៃដដែល ម្យ៉ាងកន្លែងនេះ មិនបានស្វែងរកប្រាក់ចំណូលពីភ្ញៀវទេសចរឡើយ ហើយប្រាក់ខែបុគ្គលិកថៅកែជាអ្នកទទួលខុសត្រូវ។

ដោយឡែក លោក សោម ចិន្តា ប្រធានមន្ទីរទេសចរណ៍ខេត្តកែប ក៏បានបញ្ជាក់ឲ្យដឹងដែរថា សួនមេអំបៅ គឺជាកន្លែងគោលដៅទេសចរណ៍ដ៏ទាក់ទាញមួយក្នុងចំណោមគោលដៅទេសចរណ៍ និងរមណីយដ្ឋានចំនួន ៤២ កន្លែង របស់ខេត្តកែប ហើយមន្ទីរតែងតែគាំទ្រ និងជួយសម្រួលរាល់ការងារផ្សេងៗ។

លោកប្រធានមន្ទីរទេសចរណ៍ខេត្តកែប ជំនួសមុខឲ្យរដ្ឋបាលខេត្តកែប និងមន្ទីរជំនាញ បានថ្លែងអំណរគុណដល់ម្ចាស់សួនមេអំបៅដែលអនុញ្ញាតឲ្យភ្ញៀវទេសចរចូលទៅកម្សាន្តដោយឥតគិតថ្លៃ៕

អត្ថបទ ៖ សឹង រ៉ាត់