​ដំឡូងមីនៅខេត្តរតនគិរីតម្លៃល្អ ១ គីឡូ ៤២០ រៀល

ប្រជាកសិករចាប់ផ្ដើមមមាញឹកក្នុងការប្រមូលផលដំឡូងមី ដើម្បីលក់ឲ្យឈ្មួញ ខណៈតម្លៃនៅចុងឆ្នាំ២០២៣នេះ ក្រុមឈ្មួញចុះមកទិញ មានតម្លៃខ្ពស់សមរម្យប្រសើរជាងឆ្នាំកន្លងទៅ។

នៅថ្ងៃទី ១៥ ខែធ្នូ ឆ្នាំ២០២៣ នៅភូមិប៉ក់ពោធិ៍ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី កសិករមួយក្រុមប្រមាណជាង​៣០នាក់ ដែលជាម្ចាស់ចម្ការរៀងៗខ្លួន កំពុងមមាញឹកក្នុងការប្រមូលផលដំឡូងមី ដោយធ្វើការប្រវាស់ដៃគ្នាមិនយកកម្រៃទេ គឺប្រមូលផលរួចរាល់ពីចម្ការមួយតទៅចម្ការមួយទៀតវិលជុំ។ ពួកគាត់មមាញឹកក្នុងការគាស់ កាប់ហាល ច្រកបេដើម្បីយកទុកលក់ឲ្យឈ្មួញ។

លោក ឈេវ នា អាយុ៣៨ឆ្នាំ ជនជាតិចារ៉ាយ បានឲ្យដឹងថា ជារៀងរាល់ឆ្នាំពួកគាត់ក្នុងភូមិជាមួយគ្នា ធ្វើការមិនយកកម្រៃនោះទេ គឺជួយគ្នាចាប់ផ្តើមតាំងពីដាំរហូតបានផលនោះ ដោយធ្វើប្រវ៉ះដៃគ្នាជាទម្លាប់តាំងពីដូនតាមកម្លេះ។

គាត់បានបញ្ជាក់ថា បងប្អូនជាម្ចាស់ចម្ការដំឡូងមី ដែលកំពុងគាស់ ហាលមកធ្វើការជុំគ្នា គឺយកបាយរៀងៗខ្លួនពីផ្ទះមកហូប ហើយផលដំឡូងមីឆ្នាំនេះ ទទួលផលច្រើនជាងឆ្នាំមុនៗ ដោយក្នុង១ហិកតា បានប្រមាណជា១០តោន ដោយពួកគាត់មានទឹកមុខសប្បាយរីករាយជាខ្លាំង។

លោក ហន ចយ អ្នកទិញដំឡូងមីលក់បន្តនៅស្រុកអូរយ៉ាដាវ បានឲ្យដឹងថា គាត់បានប្រមូលទិញដំឡូងមីស្រស់ក្នុង១​គីឡូក្រាម ក្នុងតម្លៃ ៤២០ រៀល ក្នុង១គីឡូក្រាម ដឹកទៅលក់នៅប្រទេសវៀតណាមបានតម្លៃ ៤៦០ទៅ៤៦៥រៀល ប៉ុន្តែឈ្មួញវៀតណាមកាត់ភាគរយក្នុង១តោន ១៥ទៅ១៨ភាគរយទៅតាមប្រភេទដំឡូងមី ឫស ដី ឬកាកសំណល់ផ្សេងៗ។

ចំណែកដំឡូងមីស្ងួតតម្លៃក្នុង១គីឡូក្រាម ៨៩០រៀល ទីផ្សារនៅប្រទេសវៀតណាម ច្រកទ្វារអន្តរជាតិអូរយ៉ាដាវ-ឡេថាញ់។

លោក សែម សារឿន ប្រធានការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្ម រុក្ខាប្រម៉ាញ់ និងនេសាទខេត្តរតនគិរីបានឲ្យសារព័ត៌មានដឹងនៅថ្ងៃទី ១៥ ខែធ្នូនេះថា ផ្ទៃដីដាំដុះដំឡូងមីទូទាំងខេត្ត មានចំនួនសរុប​១៨ ៣៧០ ហិកតា ហើយមកដល់ពេលនេះប្រជាកសិករចាប់ផ្តើមប្រមូលផលប្រហែល១៥ភាគរយ។

លោកបានបញ្ជាក់ថា នៅស្រុកអូរយ៉ាដាវមានរោងចក្រម្សៅមី ជា ទូច ដ៏ធំដោយទទួលទិញដំឡូងមីស្រស់ក្នុង១គីឡូក្រាម ៤១០រៀល កាត់១៥ភាគរយទៅលើឫស ដី កាកសំណល់ផ្សេងៗ ចំណែកឯតម្លៃប្រមូលទិញដំឡូងមីក្រៀម ៧០០ រៀលក្នុង១គីឡូក្រាម៕

អត្ថបទ៖ វុទ្ធឦសាន