ព័ត៌មានជាតិ

រដ្ឋមន្ត្រីអប់រំ ៖ ការអប់រំតាមពុទ្ធសាសនា កាន់តែមានតួនាទីចាំបាច់ក្នុងការពន្យល់សង្គមមនុស្សពីគុណតម្លៃ ធម៌វិន័យ និងគោរពច្បាប់

បានផុស

១ year មុន

នៅ

ថ្ងៃសៅរ៍ ១៦ ធ្នូ ២០២៣

ដោយ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាតំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា ការអប់រំតាមរយៈព្រះពុទ្ធសាសនាកាន់តែមានតួនាទីចាំបាច់ ដើម្បីធានាថា ការរីកចម្រើនខាងសម្ភារៈ និងស្មារតី ត្រូវតែមានល្បឿនស្មើគ្នា ការស្វែងរកភាពមានបានខាងសម្ភារៈត្រូវតែស្ថិតក្នុងក្របខណ្ឌ នៃច្បាប់ យុត្តិធម៌ សមធម៌ សុជីវធម៌ សីលធម៌ និងគុណធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបិទអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី ៣១ នៅសាលវិទ្យាស្ថានជាតិអប់រំ កាលពីរសៀលថ្ងៃទី ១៥ ធ្នូ លោកឧបនាយករដ្ឋមន្ត្រី បានបន្តថា សាសនា ជាប្រភពផ្ដល់គុណតម្លៃដ៏សំខាន់ ដែលមានឥទ្ធិពលលើរបបនយោបាយ ច្បាប់ វប្បធម៌ ប្រពៃណី ទំនៀមទម្លាប់ ហើយការប្រតិបត្តិសាសនានៅក្នុងសង្គមជាតិនីមួយៗ តែងមានជាប់ទាក់ទងនឹងប្រពៃណី ទំនៀមទម្លាប់ វប្បធម៌របស់ជាតិសាសន៍ផងដែរ ជាអត្តសញ្ញាណ និងគុណតម្លៃរួមក្នុងការដឹកនាំជីវិតរស់នៅរបស់មនុស្សក្នុងសង្គមនីមួយៗ ព្រមទាំងធ្វើឲ្យផ្នត់គំនិត ឥរិយាបថ សកម្មភាពមនុស្ស មានភាពសមរម្យ និងមានលក្ខណៈប្រហាក់ប្រហែលគ្នា អាចរស់នៅជាមួយគ្នាប្រកបដោយសុខដុមរមនា។

លោកឧបនាយករដ្ឋមន្ត្រី បានបន្តទៀតថា «ក្នុងបរិបទនេះ ការអប់រំតាមរយៈព្រះពុទ្ធសាសនាកាន់តែមានតួនាទីចាំបាច់ ដើម្បីធានាថា ការរីកចម្រើនខាងសម្ភារៈ និងស្មារតី ត្រូវតែមានល្បឿនស្មើគ្នា ការស្វែងរកភាពមានបានខាងសម្ភារៈ ត្រូវតែស្ថិតក្នុងក្របខណ្ឌ នៃច្បាប់ យុត្តិធម៌ សមធម៌ សុជីវធម៌ សីលធម៌ និងគុណធម៌។ ដូច្នេះ វាពិតជាមានភាពចាំបាច់ និងមានភាពបន្ទាន់ ក្នុងការពន្យល់សង្គមមនុស្សឲ្យមើលឃើញពីគុណតម្លៃ និងផលប្រយោជន៍ នៃការប្រព្រឹត្តត្រឹមត្រូវតាមធម៌វិន័យ ការគោរពច្បាប់ ការលើកកម្ពស់យុត្តិធម៌ មនុស្សធម៌ សីលធម៌ គុណធម៌ និងការសន្សំបុណ្យកុសល ដើម្បីបានជាបុណ្យកុសលរួម ជួយឲ្យសង្គមមានសាមគ្គីភាព សុខដុមរមនា សន្តិភាព និងការអភិវឌ្ឍប្រកបដោយចីរភាព និងជាបុណ្យកុសលសម្រាប់ជីវិត បរលោក បានទៅកាន់សុគតិភពផង និងបរមសុខផងតាមបរមពុទ្ធឱវាទ»៕

អត្ថបទ ៖ សំអឿន