ព័ត៌មានជាតិ

ឯកឧត្ដម ហ៊ុន ម៉ានី បង្ហាញកិច្ចការអាទិភាពគន្លឹះមួយផ្សេងទៀតរបស់ ក្រសួងមុខងារសាធារណៈ

បានផុស

៩ ខែ មុន

នៅ

ថ្ងៃអង្គារ ១៩ ធ្នូ ២០២៣

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានបង្ហាញពីកិច្ចការដែលជាអាទិភាពគន្លឹះមួយផ្សេងទៀតរបស់ក្រសួងមុខងារសាធារណៈ គឺ «ការពង្រឹងសមត្ថភាព និងសមិទ្ធកម្មស្ថាប័ន»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្ហាញកិច្ចការជាអាទិភាពគន្លឹះក្រសួងមុខងារសាធារណៈ នេះ បន្ទាប់ពី ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានជួបជាមួយថ្នាក់ដឹកនាំ និងមន្ត្រីបច្ចេកទេស ដើម្បីសំណេះសំណាលឈ្វេងយល់ពីគ្នាទៅវិញទៅមក ក៏ដូចជាស្តាប់របាយការណ៍ និងបញ្ហាប្រឈមចេញពីការអនុវត្តការងារផ្ទាល់របស់អគ្គលេខាធិការដ្ឋាន និងអគ្គនាយកដ្ឋានគ្រប់គ្រងមុខងារសាធារណៈ នៅទីស្ដីការក្រសួងមុខងារសាធារណៈ កាលពីយប់ថ្ងៃទី ១៨ ខែធ្នូ ឆ្នាំ ២០២៣។

ឯកឧត្ដម ហ៊ុន ម៉ានី លើកឡើង និង បង្ហាញ ថា «កែទម្រង់ណាក៏ដោយ ត្រូវចាប់ផ្ដើមពីខ្លួនឯងជាមុនសិន។ ក្រៅពីការកែទម្រង់ការប្រឡងជ្រើសរើសមន្ត្រីរាជការតាមរយៈការដាក់ឲ្យអនុវត្តប្រព័ន្ធជ្រើសរើសមន្ត្រីចូលបម្រើការងារប្រកបដោយ គុណាធិបតេយ្យ តម្លាភាព យុត្តិធម៌ បរិយាប័ន្ន និងប្រសិទ្ធភាព កិច្ចការដែលជាអាទិភាពគន្លឹះមួយផ្សេងទៀតរបស់ក្រសួងមុខងារសាធារណៈ គឺ «ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារប្រកបដោយ វិន័យ សីលធម៌ វិជ្ជាជីវៈ ប្រសិទ្ធភាព និងស័ក្ដិសិទ្ធិភាព»។

ឯកឧត្ដម ហ៊ុន ម៉ានី បញ្ជាក់ថា ក្នុងរយៈពេលកន្លងមកនេះ ក្រសួងមុខងារសាធារណៈ បាន និងកំពុងធ្វើរួចជាស្រេចហើយជុំវិញការងារពង្រឹងសមត្ថភាព និងសមិទ្ធកម្មស្ថាប័ន រាប់បញ្ចូលតាំងពីស្មារតី នៃការតាក់តែងអនុក្រឹត្យ«ការរៀបចំ និងការប្រព្រឹត្តទៅ នៃក្រសួងមុខងារសាធារណៈ», ការកែលម្អរចនាសម្ព័ន្ធដើម្បីប្រើប្រាស់មន្ត្រីរាជការឲ្យស្របតាមចំណេះ ជំនាញ និងបទពិសោធន៍ ហើយប្រើប្រាស់ឲ្យអស់ពីសក្ដានុពល, ការកំណត់និយាមប្រតិបត្តិ ប្រព័ន្ធការងារ និងទម្លាប់ការងារច្បាស់លាស់ រួមទាំងការរៀបចំវគ្គបណ្ដុះបណ្ដាលជំនាញ និងអភិវឌ្ឍន៍សមត្ថភាពផ្សេងៗ ទៀត។

ឯកឧត្ដម បន្ថែមថា ជំនួបជាមួយថ្នាក់ដឹកនាំ និងមន្ត្រីជំនាញ នៃអគ្គលេខាធិការដ្ឋាន និងអគ្គនាយកដ្ឋាននានាជាបន្តបន្ទាប់ ដូចអ្វីដែលកំពុងធ្វើនាពេលនេះ គឺជាសកម្មភាពបន្ថែមមួយកម្រិតទៀត ក្នុងគោលដៅជួបប្រតិបត្តិករជាក់ស្ដែង ដើម្បីជជែកគ្នា ឈ្វេងយល់ពីគ្នា ស្តាប់របាយការណ៍ និងបញ្ហាប្រឈមដោយផ្ទាល់ ហើយស្វែងរកដំណោះស្រាយរួមជាមួយគ្នា។

ឯកឧត្ដមរដ្ឋមន្ត្រីក្រសួងមុខងារសាធារណៈ បន្ថែមទៀតថា ដំណើរការទាំងអស់នេះ គឺជាចំណែកការងារតូចៗ រួមបញ្ចូលគ្នា ដែលក្រសួងមុខងារសាធារណៈ បានចាប់ផ្ដើមធ្វើជាបន្តបន្ទាប់រួចមកហើយ ក្នុងគោលដៅឆ្លើយតបទៅនឹងគោលនយោបាយកែទម្រង់រដ្ឋបាលសាធារណៈរបស់រាជរដ្ឋាភិបាលកម្ពុជា ក្រោមការដឹកនាំដ៏ស្វាហាប់របស់ សម្ដេចធិបតី នាយករដ្ឋមន្ត្រី។ ទោះបីជាក្រសួងមុខងារសាធារណៈ បានសម្រេចការងារជាច្រើនរួចមកហើយក៏ពិតមែន តែនៅមានការងារជាច្រើនទៀតដែលត្រូវធ្វើបន្ត៕

អត្ថបទ ៖ ពិសី