ចាប់ផ្តើមប្រមូលផលដំឡូងមីខេត្តព្រះវិហារមានទីផ្សារ និងតម្លៃខ្ពស់

ដំឡូងមី ខេត្តព្រះវិហារ ចាប់ផ្តើមប្រមូលផលបានរយៈពេលជិត ១០ថ្ងៃមកហើយ ក្រោយពីកសិករ បានបិទបញ្ចប់​ការប្រមូលផលស្រូវ។ នេះបើតាមការបញ្ជាក់របស់ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ។

ថ្លែងប្រាប់កម្ពុជាថ្មី នៅព្រឹកថ្ងៃទី ១៩ ខែ ធ្នូ លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះ​វិហារ បានឱ្យដឹងថា ឆ្នាំ ២០២៣នេះ ការដាំដុះដំឡូងមីមានភាពល្អប្រសើរ ជាពិសេសការប្រមូលផលរយៈពេល ១សប្តាហ៍មកនេះ មានទិន្នផលខ្ពស់ និងតម្លៃសមរម្យ។

លោកបានបន្តថា ដោយសារតម្លៃមានការកើនឡើងប៉ុន្មានឆ្នាំជាប់គ្នានេះ ប្រជាកសិករក្នុងខេត្តព្រះវិហារ បានបង្កើនការដាំ​ដុះ​ដំឡូងមីជាច្រើន។ បើតាមលោក ពឹង ទ្រីដា គិតមកដល់ពេលនេះ ដំឡូងមីស្រស់ មានតម្លៃ ៣៧០រៀល ទៅ ៣៨០រៀល ក្នុងមួយគីឡូ ដោយតម្លៃនេះខ្ពស់ជាងឆ្នាំមុនបន្តិច។

ប្រធានមន្ទីរកសិកម្មខេត្តព្រះវិហារ បានគូសបញ្ជាក់ថា សព្វថ្ងៃនេះ មានក្រុមហ៊ុនចំនួន៣ ទទួលទិញដំឡូងមី ខេត្តព្រះវិហារ ក្នុងនោះរួមមាន ក្រុមហ៊ុនThai Wha និងក្រុមហ៊ុន CACC បានចុះកិច្ចសន្យាជាមួយសហគមន៍​ចំនួន១០ ប្រមូលទិញដំឡូងសរីរាង្គស្រស់ចំនួន ៩ពាន់តោន, ក្រុមហ៊ុន Hang Harvest ចុះកិច្ចសន្យា​ជាមួយ​សហគមន៍ទិញដំឡូងមីចំណិតក្រៀម ក្រៅពីនេះ មានឈ្មួញកណ្តាលជាច្រើនបង្កើតដេប៉ូ ប្រមូលទិញតាម​ភូមិស្រុកនីមួយៗ។​

ខេត្តព្រះវិហារ បានបែងចែកជាច្រើនសហគមន៍ដាំដុះដំឡូងមី បន្ទាប់ពីធ្វើស្រែចម្ការ។ ក្នុងនោះមានកសិករប្រមាណជាង ១ម៉ឺនគ្រួសារ បានប្រកបរបរដាំដំឡូងមី លើផ្ទៃដីប្រមាណជាង ៣ម៉ឺន៥ពាន់ហិចតា។ នេះបើតាមការបញ្ជាក់របស់លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ៕