​ទិន្នផល​ក្រូចពោធិ៍សាត់​ខេត្ត​បាត់ដំបង​កើន​ជាង ៤ ពាន់​តោន ខណៈកសិករ​ពង្រីកផ្ទៃដីដាំដុះស្ទើរ​គ្រប់ស្រុក​

ក្នុងឆ្នាំនេះទិន្នផលក្រូចពោធិ៍សាត់ខេត្តបាត់ដំបងបានកើនឡើងខ្ពស់ជាងឆ្នាំមុន ខណះដែលប្រជាកសិករនៅតាមបណ្តាស្រុកមួយចំនួនបានពង្រីកផ្ទៃដី​ដាំដុះ​បន្ថែម ដោយសារមានទីផ្សារល្អប្រសើរ។

មន្ត្រីនៃមន្ទីរកសិកម្មខេត្តបាត់ដំបង​បានឲ្យដឹងថា ពីដើម​មានស្រុកចំនួន ២ ដែលនិយម​ដាំដុះក្រូច​ពោធិ៍សាត់​គឺ​ស្រុកបាត់ដំបង (បច្ចុប្បន្នក្រុង​បាត់ដំបង) និងស្រុកបាណន់។ ដោយឡែក​តាមបណ្តាស្រុកមួយចំនួនទៀតមាន​ដាំ​ដែរ​​​តែ​តិចតូចប៉ុណ្ណោះ​។

ដោយសារតែភាពល្បីល្បាញនៃក្រូចពោធិ៍សាត់​ខេត្តបាត់ដំបង បច្ចុប្បន្ន​ប្រជាកសិករបានចាប់ផ្តើមពង្រីកផ្ទៃដី​ដាំដុះ​បន្ថែម​ស្ទើរគ្រប់ស្រុកស្របពេលមានតម្រូវការ​លើទីផ្សារ។

បើតាមមន្រ្តីកសិកម្ម​ខេត្តបាត់ដំបង ក្នុងគោលបំណងលើកកម្ពស់ដល់សុខភាពអ្នកបរិភោគ ក៏ដូចជារក្សា​រសជាតិ​ដើមដែលកើតចេញពីធម្មជាតិផង មន្ត្រីជំនាញបានណែនាំដល់​កសិករ​ក្នុងការ​ដាំ​និង​ទាំងរបៀបថែទាំ ដោយមិនឲ្យប្រើប្រាស់​ជី​ឬថ្នាំដែលមានជាតិគីមីនោះទេ។

ដំណាំក្រូច​ពោធិ៍សាត់​បាន​​​​​ពង្រីកផ្ទៃដី​ដាំដុះដល់ ១១ ស្រុកក្នុងចំណោមស្រុក​​ក្រុង​ទាំង ១៤ ក្នុង​ខេត្ត​បាត់ដំបង​ហើយ​ទិន្នផល​ក៏កើនឡើង​ខ្ពស់។ ឆ្នាំនេះទិន្នផល​សរុប​បានកើន​ដល់​​​ ១៥ ៧៦០ តោន ខណៈ​ឆ្នាំមុន​ទទួលបាន​ទិន្នផល​បាន​ចំនួន ១១ ៩៤៥ តោន។

ទូទាំងខេត្តបាត់ដំបងស្រុក​ដែលមានដាំដុះដំណាំក្រូចពោធិ៍សាត់​មានដូចជា÷ ស្រុកបាណន់, ថ្មគោល, បាត់ដំបង,បវេល, ឯកភ្នំ, សង្កែ, សំឡូត, កំរៀង,រុក្ខគីរី និងស្រុក គាស់ក្រឡ ហើយផ្ទៃដីដាំដុះ​បាន​កើនដល់​​​ចំនួន ១.០០១ ហិកតា​ធៀបឆ្នាំមុនមានត្រឹម ៩០៤ ហិកតាប៉ុណ្ណោះ៕

អត្ថបទ៖​ សៅ សារិទ្ធ