​៥ ខេត្ត ​អាកាសធាតុផ្ដើមចុះត្រជាក់ទាបបំផុត​ចាប់ពីថ្ងៃស្អែក​

យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយមបានឱ្យដឹងថា ​ចាប់ពីថ្ងៃទី ២១ ខែធ្នូ ឆ្នាំ ២០២៣ ប្រព័ន្ធនៃសម្ពាធខ្ពស់នៅលើប្រទេសចិនបង្កើន​ឥទ្ធិពលគ្របដណ្តប់លើប្រទេស​កម្ពុជា ជាមួយនឹងខ្យល់មូសុងឦសាន​បក់ពីបង្គួរទៅខ្លាំង។

​បាតុភូតនេះ នឹងធ្វើឱ្យអាកាសធាតុចុះត្រជាក់ខ្លាំងរយៈពេល ៤ ថ្ងៃចាប់ពីថ្ងៃទី ២១ ដល់ថ្ងៃទី ២៤ ខែធ្នូ ឆ្នាំ ២០២៣។

​ខេត្តដែលចុះត្រជាក់ខ្លាំងជាងគេចំនួន ៥ គឺ ខេត្តមណ្ឌលគិរី ព្រះវិហារ ឧត្តរមានជ័យ រតនគិរី និងខេត្តប៉ៃលិនសីតុណ្ហ​ភាព​អប្បបរមាពី ១៥-១៦°C ជាសីតុណ្ហភាពនៅពេលព្រឹក។​

ចំណែកឯ ខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ធំ និងខេត្តស្ទឹងត្រែងសីតុណ្ហភាពអប្បបរមាពី ១៧-១៩°C។ រីឯរាជធានីភ្នំពេញ និងបណ្តាខេត្តដទៃទៀតសីតុណ្ហភាពអប្បបរមាពី ២០-២៣°C។

ដោយឡែក នៅលើផ្ទៃសមុទ្រខ្យល់បក់មកពីទិសឦសានក្នុងល្បឿនពី៧-៩ម៉ែត្រ/វិនាទី និងរលកសមុទ្រមានកម្ពស់ ពី ១,៥០-២,០០ ម៉ែត្រ។

ក្រសួងក៏អំពាវនាវឱ្យសាធារណជនប្រុងប្រយ័ត្ន ថែរក្សាសុខភាព ស្លៀកសម្លៀក​បំពាក់ឱ្យបាន​គត់មត់ ដើម្បីបង្ការពីជំងឺដង្កាត់នានា ដែលអាចកើតមានឡើងជាយថាហេតុ៕