នាយករដ្ឋមន្រ្តី​កម្ពុជា​លើក​​ឈ្មោះ​ក្រុមហ៊ុន​ជប៉ុន​ចំនួន ២ កំពុង​ជោគជ័យ​គម្រោង​វិនិយោគ​នៅ​កម្ពុជា

នា​ដំណើរ​ទស្សនកិច្ច​ចូលរួម​កិច្ច​​ប្រជុំ​កំពូល​រំលឹក​ខួប​អនុស្សាវរីយ​អាស៊ាន​ជប៉ុន​នៅ​ទីក្រុង​តូក្យូ​ប្រទេស​ជប៉ុន សម្តេច​ធិបតី ហ៊ុន ម៉ាណែត​ បានលើកទឹកចិត្ត​អ្នកវិនិយោគជប៉ុនឱ្យបន្តវិនិយោគ ព្រមទាំង​ពង្រីកអាជីវកម្ម​ដែលមានស្រាប់នៅកម្ពុជា។

នា​ឱកាស​នោះ មេដឹកនាំ​កម្ពុជា​ក៏​បាន​លើក​ពី​ជោគជ័យ​របស់​ក្រុមហ៊ុន​ជប៉ុន​ចំនួនពីរ​ក្នុង​ចំណោម​ក្រុមហ៊ុន​ជប៉ុន​ផ្សេងទៀត ដើម្បី​ទាក់ទាញ​វិនិយោគ​ទុន​ជប៉ុនមក​​កម្ពុជា។​

សម្តេច​ធិបតី​បានលើកឡើងពី​ក្រុមហ៊ុន​ AEON Mall Cambodia Co., Ltd ដែល​បោះ​ទុនវិនិយោគ​សាងសង់​ផ្សារទំនើបនៅ​រាជធានីភ្នំពេញ។

សម្តេចបាន​គូស​បញ្ជាក់​ថា ក្រុមហ៊ុន​​ចាប់ផ្តើម​ជាមួយ​ទុន​ដំបូងវិនិយោគ​សាងសង់​ផ្សារ​ទំនើប​ចំនួន ២០០ លានដុល្លារអាមេរិក។ ក្នុងរយៈពេលប៉ុន្មានឆ្នាំក្រុមហ៊ុន​បាន​ពង្រីក​ទុន​បន្ថែមចំនួន​ ៤០៩ លានដុល្លារអាមេរិក ដើម្បីសាងសង់ផ្សារទំនើប AEON Mall ទីពីរ និងទីបី រួមទាំង​បង្កើត​ក្រុមហ៊ុន​បុត្រសម្ព័ន្ធមួយទៀតឈ្មោះថា AEON Mall (Cambodia) Logi Plus Co., Ltd ដើម្បី​រួម​ចំណែក​ដោះស្រាយបញ្ហាដឹកជញ្ជូននៅក្នុងប្រទេសកម្ពុជា។

សម្ដេចធិបតី​បាន​លើក​ក្រុមហ៊ុន​ជប៉ុន​​មួយ​ទៀត​ដែល​ជោគជ័យ​នៅ​កម្ពុជា​គឺ Minebea Cambodia Co. Ltd។ Minebea Cambodia Co. Ltd ​ដែល​ជាក្រុមហ៊ុន​បុត្រសម្ព័ន្ធ​របស់​ក្រុមហ៊ុន Minebea Mitsumi បានចាប់ផ្តើម​​វិនិយោគ​នៅ​កម្ពុជា​ក្នុង​ឆ្នាំ​២០១១ ​ក្នុង​ទុន​ដំបូង​ត្រឹមតែ ​២៣ លាន​ដុល្លារ។ គិតត្រឹមឆ្នាំ​២០២២ ក្រុមហ៊ុន​បាន​បង្កើន​ទុន​វិនិយោគ​ចំនួន ៦១៤ លានដុល្លារ​អាមេរិក ជាមួយ​បុគ្គលិកសរុបចំនួន ៦៦៣០ នាក់។

ជាមួយ​​ជោគជ័យ​ក្រុមហ៊ុនជប៉ុន​ដែលកំពុង​វិនិយោគនៅ​កម្ពុជា​ សម្តេច​នាយករដ្ឋមន្រ្តីលើកទឹកចិត្តដល់​អ្នកវិនិយោគជប៉ុនឱ្យបន្តវិនិយោគនៅកម្ពុជា ជាពិសេសក្នុងវិស័យដែលមានសក្តានុពលខ្ពស់។ សម្ដេចធិបតី​បានគូស​បញ្ជាក់​ថា រាជរដ្ឋាភិបាល​​កម្ពុជាបាននឹងកំពុងយកចិត្តទុកដាក់ធានានិរន្តរភាពនៃ​បរិយាកាស​អំណោយផលសម្រាប់​ធុរកិច្ច និងវិនិយោគ តាមរយៈការដាក់ចេញគោលនយោបាយ ច្បាប់​វិនិយោគ យន្តការ​អនុវត្ត និងក្របខ័ណ្ឌ គតិយុត្តថ្មីៗ ព្រមទាំងការ​អភិវឌ្ឍ​ហេដ្ឋារចនាសម្ព័ន្ធ​តភ្ជាប់ និងឡូជីស្ទិក​សំខាន់ៗ ដូចជា ផ្លូវលឿន ផ្លូវដែក និងកំពង់ផជាដើម។

គួរ​បញ្ជាក់ថា ក្នុង​ដំណើរ​ទស្សនកិច្ច​ចូលរួម​កិច្ច​ប្រជុំ​កំពូល​រំលឹក​ខួប​អនុស្សាវរីយ​អាស៊ាន​ជប៉ុន​នៅ​ទីក្រុង​តូក្យូ​ប្រទេស​ជប៉ុន​ពី​ថ្ងៃ​ទី​ ១៥ ដល់​ថ្ងៃ​ទី ១៩ ខែ​ធ្នូ​ ឆ្នាំ​២០២៣ សម្តេច​ធិបតី ហ៊ុន ម៉ាណែត ក៏​បាន​ជួប​ថ្នាក់​ដឹកនាំក្រុមហ៊ុន​ជប៉ុន​ធំៗ​​ដើម្បី​សម្តែង​ការគួរសម​និងពិភាក្សា​ការងារ​។

ថ្នាក់​ដឹកនាំ​ជាន់ខ្ពស់​ក្រុមហ៊ុន​ជប៉ុន​លំដាប់អន្តរជាតិ ដែល​បាន​ចូលជួប​​ប្រមុខ​មេដឹកនាំកម្ពុជា​ក្នុងនោះរួមមាន ក្រុមហ៊ុន Yasaki (Cambodia) Wiring Systems Co., Ltd. ក្រុមហ៊ុនសហព័ន្ធសេដ្ឋកិច្ចតំបន់កាន់សៃ ក្រុមហ៊ុន Sumitomo Corporation ក្រុមហ៊ុន Pharma Foods International Co., Ltd. ក្រុមហ៊ុន Ehime Package ក្រុមហ៊ុន Kojima Holdings Co., Ltd. ក្រុមហ៊ុន Minebea Mitsumi ក្រុមហ៊ុន Meiji Co., Ltd. ក្រុមហ៊ុន Toyota Tsusho Manufacturing (Cambodia) Co., Ltd. ក្រុមហ៊ុន AEON MALL Co., Ltd. ក្រុមហ៊ុន NTT DOCOMO INC. ក្រុមហ៊ុន DMG MORI CO., Ltd. និងស្ថាប័ន Japan External Trade Organization ផង​ដែរ៕