ក្រមសីលធម៌ វិជ្ជាជីវៈ នៅតែជាប្រធានបទក្តៅសម្រាប់វេទិកានិពន្ធនាយកសារព័ត៌មានកម្ពុជា ឆ្នាំនេះ

នៅព្រឹកថ្ងៃទី២១ ខែធ្នូ ឆ្នាំ២០២៣នេះ ក្លិបអ្នកកាសែតកម្ពុជា(ក.អ.ក) បានរៀបចំវេទិកានិពន្ធនាយកសារព័ត៌មានកម្ពុជា ក្រោមប្រធានបទ « វិជ្ជាជីវៈ និងក្រមសីលធម៌សារព័ត៌មាន»។

វេទិកានិពន្ធនាយកសារព័ត៌មានកម្ពុជា ជាវេទិកាប្រចាំឆ្នាំដ៏ធំបំផុតរបស់ក្លិបអ្នកកាសែតកម្ពុជា ដែលនៅក្នុងឆ្នាំ២០២៣ នេះ ជាលើកទី២០។ តាមរយៈប្រធានបទខាងលើ ដើម្បីផ្តល់ឱកាសដល់នាយកគ្រប់គ្រង និពន្ធនាយក ឬអ្នកដឹកនាំស្ថាប័នសារព័ត៌មានទាំង កាសែត, វិទ្យុ, ទូរទស្សន៍, រួមទាំងសារព័ត៌មានអនឡាញ បានជជែកពិភាក្សាជាថ្មីម្តងទៀតពាក់ព័ន្ធនឹងបញ្ហាក្រមសីលធម៌វិជ្ជាជីវៈសារព័ត៌មាន ដែលរហូតមកដល់ពេលនេះ ក.អ.ក នៅតែកត់សម្គាល់ឃើញថា អ្នកសារព័ត៌មានមួយចំនួននៅតែមិនទាន់អនុវត្តនូវក្រមសីលធម៌វិជ្ជាជីវៈសារព័ត៌មានអោយបានត្រឹមត្រូវនៅឡើយ ដែលនាំឱ្យប៉ះពាល់ដល់វិស័យសារព័ត៌មាននៅកម្ពុជា។

ដូច្នេះ វេទិកាលើកទី២០ នេះ នឹងជជែកពិភាក្សាឱ្យបានល្អិតល្អន់ឡើងវិញលើបញ្ហាក្រមសីលធម៌វិជ្ជាជីវៈសារព័ត៌មាន ព្រមទាំងស្វះស្វែងរកវិធី ឬបង្កើតយន្តការណាមួយ សំដៅធ្វើយ៉ាងណាជួយ តម្រង់ទិសអ្នកសារព័ត៌មាន និងលើកទឹកចិត្តឲ្យពួកគេចូលរួមកាន់តែសកម្មក្នុងការអនុវត្តន៍ក្រមសីលធម៌វិជ្ជាជីវៈ ហើយចាត់ទុកការប្រតិបត្តិក្រមសីលធម៌វិជ្ជាជីវៈជាប្រការសំខាន់ក្នុងការងារប្រចាំថ្ងៃ៕

អត្ថបទ៖​ ធឿន វ៉ាន់សុង