ផែកុងតឺន័រទឹកជ្រៅថ្មី នឹងកាត់បន្ថយថ្លៃដឹកជញ្ជូនជាង ២០០ ដុល្លារ/កុងតឺន័រ

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍នៅថ្ងៃទី ២២ ខែធ្នូ ឆ្នាំ ២០២៣នេះថា នៅពេលដែលការសាងសង់ចំណតផែកុងតឺន័រទឹកជ្រៅជំហានទី១ រួចរាល់ នឹង​ជួយបង្កើនសក្ដានុពលសេដ្ឋកិច្ច និងកាត់បន្ថយតម្លៃដឹកជញ្ជូន។

សម្ដេចធិបតី ហ៊ុន ម៉ាណែត បានលើកឡើងថា បច្ចុប្បន្ន ​កម្ពុជាមានសក្ដានុពលភូមិសាស្ត្រល្អ​ ប៉ុន្តែមិនទាន់ចាប់បានសក្ដានុពលអស់សម្រាប់សេដ្ឋកិច្ច។ ហើយថា ផែកុងតឺន័រទឹកជ្រៅរបស់កម្ពុជាបានត្រឹមតែ ១១,៥ ម៉ែត្រ ចំណតកប៉ាល់ក៏មានតិច ប៉ុន្តែអាចឱ្យកប៉ាល់កុងតឺន័រចូលចតលើសសមត្ថភាព។

សម្ដេចធិបតីមានប្រសាសន៍ថា៖ «ទីតាំងចតកប៉ាល់របស់យើងក៏មានតិច តែខ្ញុំកោតសរសើរមកដល់​ម៉ោងនេះលទ្ធភាពយើងតែ ៥៥ ម៉ឺន TEUs/១ ឆ្នាំ ខ្នាត ៦ ម៉ែត្រ ប៉ុន្តែយើងធ្វើជាក់ស្ដែងបានជិត ៨០ ម៉ឺន TEUs/១ ឆ្នាំ»។

សម្ដេចបន្តថា បច្ចុប្បន្នផែកុងតឺន័រជម្រៅត្រឹមតែ ១១,៥ ម៉ែត្រ ខណៈកប៉ាល់ដែលចូលមកបានត្រឹមតែ ១៨ ភាគរយ។ ឧទារណ៍ថា ១០០ កប៉ាល់ដឹកទំនិញមកស្រុកខ្មែរ មានតែ ១៨ កប៉ាល់ទេដែលដឹកទំនិញចូលមកក្នុងសាង ក្រៅពីហ្នឹងចេញទៅសាងពីក្រៅមកទាំងអស់ កន្លែងខ្លះគេដឹកទៅដល់ប្រទេសផ្សេង លើកពីប្រទេសផ្សេងដាក់កប៉ាល់តូចមកយើង ចឹងបានថា កប៉ាល់ធំៗមកពីអាមេរិកចូលមកយើងអត់បាន អញ្ចឹងគេរំលង យើងបាន ៨០ ម៉ឺន មិនទាន់អស់ទេ អាហ្នឹងបានតែកប៉ាល់ល្មមៗ ចូល ១១ ម៉ែត្រផង។ ឥលូវហេតុអ្វីបានជាយើងត្រូវពង្រីក និងជីកកន្លែងចតកប៉ាល់បន្ថែមទៀតជំហានទី១នេះ យើងជីកទៅដល់ ១៤,៥ ម៉ែត្រ អញ្ចឹង កប៉ាល់ ៦ ម៉ឺនតោនអាចចូលចតនៅយើងបាន ដែលអាចដឹកកុងតឺន័រ ៤ ០០០ ចូលមកបាន។

បើតាមសម្ដេចនាយករដ្ឋមន្ត្រី នៅពេលដែលចំណតផែកុងតឺន័រទឹកជ្រៅជំហានទី១ រួចរាល់នៅឆ្នាំ ២០២៦ ក្នុងចំណោមកប៉ាល់ ១០០ មាន ៩៣ កប៉ាល់ អាចចូលចតនៅកម្ពុជា។ សម្ដេចថា កប៉ាល់មួយៗ ពេលដែលត្រូវចតសាងកប៉ាល់ ខាតទាំងពេលវេលា និងលុយអញ្ចឹងបើគេចៀសបានគេមិនមកយើងទេ ផែជិតខាងហ្នឹងគេដឹកទៅដល់តែម្ដង អញ្ចឹងកប៉ាល់ធំៗមួយចំនួនគេមិនមកយើងខាត។

សម្ដេចធិបតីបានបន្តថា៖ «ឥឡូវកប៉ាល់ដែលដឹកមកដល់យើងតែម្ដង ដាក់ចុះនៅយើង ដោយមិនចាំបាច់សាង ហើយ​បង់លុយថែមទៅកន្លែងផ្សេងដឹកមកដល់យើងកាន់តែច្រើន ធ្វើឱ្យថ្លៃដឹកជញ្ជូនកាន់តែថយ។ ឥឡូវ ១ កុងតឺនឺ ៧០០ ដុល្លារ ពេលដែលជំហាន១នេះ រួចរាល់ កាត់បន្ថយថ្លៃដឹកជាង២០០ ដុល្លារ»។

យោងតាមរបាយការណ៍របស់ក្រសួងសាធារណៈការ និងដឹកជញ្ជូន បានបង្ហាញថា នៅក្នុងរយៈពេល១១ខែ ឆ្នាំ២០២៣​បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុ បានកើនឡើង ១១,៣៤ ភាគរយ និងទទួលបានចំណូលអាជីវកម្មសរុប​ចំនួនជាង ៨៥ លានដុល្លារអាមេរិក បើធៀបនឹង​រយៈពេលដូចគ្នាឆ្នាំ២០២២។

លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា បានបញ្ជាក់ថា រយៈពេល១១ខែ ឆ្នាំ២០២៣​នេះ បរិមាណទំនិញឆ្លងកាត់មានចំនួន​ជាង៧លានតោន កើនឡើង១១,៣៤ភាគរយ និងចំណូលអាជីវកម្មសរុបមាន​ចំនួនជាង៨៥លានដុល្លារអាមេរិក កើនឡើង ២,៧១ភាគរយ បើធៀបនឹង​រយៈពេលដូចគ្នាឆ្នាំ២០២២។

លោករដ្ឋមន្ត្រី បានបន្តថា បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ មានចំនួនសរុបជាង៧៥ម៉ឺនTEUs ដោយមានកំណើនជាមធ្យម១០,៨៣ភាគរយក្នុងរយៈពេល ១២ឆ្នាំចុងក្រោយ បើគិតចាប់ពីឆ្នាំ២០១០ ដល់ឆ្នាំ២០២២៕

អត្ថបទ៖ ឡេង ដេត