ព័ត៌មានជាតិ

ឯកឧត្ដម ហ៊ុន ម៉ានី ៖ ក្រៅពីត្រូវខិតខំរៀនសូត្រ សិស្ស-និស្សិត ក៏មានតួនាទីជាអ្នកផ្សព្វផ្សាយ ធ្វើឲ្យពិភពលោកស្គាល់កម្ពុជាដែរ

បានផុស

១ year មុន

នៅ

ថ្ងៃសុក្រ ២២ ធ្នូ ២០២៣

ដោយ

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានចែករំលែកបទពិសោធន៍ និងទស្សនៈមួយចំនួនទៅកាន់ក្រុមនិស្សិតកម្ពុជាដែលទៅបន្តការសិក្សានៅក្រៅប្រទេសថា ក្រៅពីត្រូវខិតខំរៀនសូត្រក្រេបយកចំណេះវិជ្ជាពីសាលា សិស្ស-និស្សិត ក៏មានតួនាទីជាអ្នកផ្សព្វផ្សាយ ធ្វើឲ្យពិភពលោកស្គាល់ពីកម្ពុជាផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចែករំលែកបទពិសោធន៍ និងទស្សនៈនេះ ក្នុងឱកាស ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានទទួលជួបក្រុមនិស្សិតកម្ពុជា ចំនួន ៣៣ នាក់ ដែលជាជ័យលាភីអាហារូបករណ៍ទៅសិក្សានៅប្រទេសអូស្ត្រាលី និងនូវែលសេឡង់ កាលពីព្រឹកថ្ងៃទី ២២ ខែធ្នូ ឆ្នាំ ២០២៣។

នាឱកាសនោះដែរ ឯកឧត្ដម ហ៊ុន ម៉ានី បានមានប្រសាសន៍ថា ព្រឹកនេះ ឯកឧត្ដម បានទទួលជួបក្រុមនិស្សិតកម្ពុជា ដែលជាជ័យលាភីអាហារូបករណ៍ទៅសិក្សានៅប្រទេសអូស្ត្រាលី និងនូវែលសេឡង់ ចំនួន ៣៣ នាក់។

ជាមួយនេះ ឯកឧត្ដម ហ៊ុន ម៉ានី បានចែករំលែកនូវបទពិសោធន៍ និងទស្សនៈមួយចំនួនពីការទៅបន្តការសិក្សានៅក្រៅប្រទេស ដែល ឯកឧត្ដម ធ្លាប់បានឆ្លងកាត់។ ឯកឧត្ដម បានចែករំលែកបទពិសោធន៍ និងទស្សនៈ ផ្ទាល់ខ្លួនថា «ក្រៅពីត្រូវខិតខំរៀនសូត្រ ក្រេបយកចំណេះវិជ្ជាពីសាលា ប្អូនៗ ក៏មានតួនាទីជាអ្នកផ្សព្វផ្សាយ និងធ្វើឲ្យគេស្គាល់ពីកម្ពុជាផងដែរ។ បន្ថែមពីលើនេះ សូមឲ្យ ប្អូនៗ ប្រយ័ត្នប្រយែងចំពោះសុខភាព និងចេះជួយយកអាសាគ្នាតាមលទ្ធភាពដែលអាចធ្វើបាន»។

ទន្ទឹមនោះ ជំនួសមុខឲ្យ សម្ដេចអគ្គមហាសេនាបតីតេជោ ហ៊ុន សែន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្ដម ហ៊ុន ម៉ានី ក៏បានពាំនាំបណ្ដាំផ្ញើសាកសួរសុខទុក្ខ និងពាក្យពេចន៍អបអរសាទរដល់ ក្រុមនិស្សិតកម្ពុជា ទាំងអស់ ដែលទទួលបានឱកាសទៅសិក្សានៅក្រៅប្រទេសផងដែរ។ ក្នុងនោះ ឯកឧត្ដម បានបន្ថែមថា សម្ដេចទាំង ៣ តែងយកចិត្តទុកដាក់ និងគិតគូរពីសុខទុក្ខសិស្ស-និស្សិត គ្រប់រូប ដែលលោកតែងចាត់ទុកពួកគេជាធនធានដ៏មានសារៈសំខាន់របស់ប្រទេសជាតិ៕

អត្ថបទ ៖ ពិសី