នាយករដ្ឋមន្រ្តី ជំរុញក្រសួងពាណិជ្ជកម្មបង្កើន​ការផលិតក្នុងស្រុក និងស្រាវជ្រាវ​ចុះបញ្ជីម៉ាកទំនិញ

សម្តេចនាយកករដ្ឋមន្រ្តី ហ៊ុន ម៉ាណែត បានណែនាំឱ្យក្រសួងពាណិជ្ជកម្មត្រូវសហការ​ពង្រឹងការផលិតនូវផលិត​ផលក្នុងស្រុក ដោយរៀបចំយុទ្ធសាស្រ្តជំរុញការប្រើប្រាស់ផលិតផលខ្លួនឯង តាមរយៈការរៀបចំពិព័រណ៍ក្នុងស្រុក និងអន្តរជាតិ។ លើសពីនេះទៀត ត្រូវជួយដល់វិស័យឯកជន ក្នុងការបង្កើតសភាពាណិជ្ជកម្ម តាមរាជធានីខេត្ត និងតំណាងសភាពាណិជ្ជកម្មកម្ពុជា នៅក្រៅប្រទេស ព្រមទាំងបង្កើតសមាគមតាមមុខរបរ និងផលិតផល ដើម្បីចូលរួមក្នុងខ្សែច្រវ៉ាក់ផ្គត់ផ្គង់ ដោយចាប់យកឱកាសពាណិជ្ជកម្ម។ សម្តេចនាយករដ្ឋមន្រ្តីលើកឡើងបែបនេះ នៅក្នុងពិធីបិទសន្និបាត បូកសរុបលទ្ធផលការងារក្រសួងពាណិជ្ជកម្ម នារសៀលថ្ងៃទី២២ ខែធ្នូ ឆ្នាំ២០២៣។

ទន្ទឹមនឹងនេះ សម្តេច ហ៊ុន ម៉ាណែត បានជំរុញឱ្យក្រសួងពាណិជ្ជកម្ម ត្រូវយកចិត្តទុកដាក់ បន្តការស្រាវ​ជ្រាវចុះបញ្ជីម៉ាក​សម្គាល់ភូមិសាស្រ្តទំនិញ និងម៉ាកសមូហភាពឱ្យបានកាន់តែច្រើនថែមទៀត ដើម្បីលើកស្ទួយគុណភាព និងម៉ាក​របស់​ផលិតផលកម្ពុជា នៅលើទីផ្សារក្នុងស្រុក និងក្រៅប្រទេស។

ជាមួយគ្នានេះ ក្រសួងពាណិជ្ជកម្ម ត្រូវរៀបចំផែនការសម្រាប់កាត់បន្ថយការនាំចូលទំនិញពីក្រៅប្រទេស នៅពេលកម្ពុជា អាចផលិតបាន។

ក្រសួងពាណិជ្ជកម្ម ក៏ត្រូវបន្តផ្សព្វផ្សាយអំពីទីផ្សារ និងលក្ខខណ្ឌនានា ទៅកាន់គ្រប់ផលិតករ និងភាគីពាក់ព័ន្ធទាំងអស់ ដើម្បីបញ្ចៀសការផ្គត់ផ្គង់លើសតម្រូវការទីផ្សារ។

សម្តេចបានគូសបញ្ជាក់ដូច្នេះថា « ពាណិជ្ជកម្មមិនមែនតែក្រៅប្រទេសនោះទេ ការនាំចេញនៅនឹងកន្លែង ការនាំចេញ​នៅក្នុងស្រុក ក៏ជាពាណិជ្ជកម្មធំមួយដែរ ហើយសក្តានុពលក្នុងប្រទេសធំណាស់»។

​ផលិតកម្មក្នុងស្រុក គឺត្រូវបង្កើនផលិតភាពក្នុងការតភ្ជាប់រវាងអ្នកផលិត និងអតិថិជនអ្នកប្រើប្រាស់ឱ្យបានកាន់តែច្រើន ដើម្បីលើកកម្ពស់ផលិតផលខ្មែរ កាត់បន្ថយនូវការនាំចូលពីខាងក្រៅ។ នេះជាការបន្ថែមរបស់សម្តេច ហ៊ុន ម៉ាណែត។

រយៈពេល ១១ ខែ ឆ្នាំ២០២៣ កម្ពុជា​ សម្រេច​បាន​ទំហំពាណិជ្ជកម្មអន្តរជាតិប្រមាណ ៤៣.៥២ ពាន់លានដុល្លារ​អាមេរិក ក្នុងនោះ ការនាំចេញមានចំនួន ២១ ពាន់លានដុល្លារអាមេរិក កើនឡើង ៤.០៨% បើប្រៀបធៀបនឹងការ​នាំចេញរយៈពេល​១១ខែ ឆ្នាំ២០២២។

ថ្លែងនៅក្នុង​សន្និបាតបូកសរុប​លទ្ធផលការងារ​ក្រសួងពាណិជ្ជកម្ម​ លោកស្រី ចម និម្មល រដ្ឋមន្រ្តីក្រសួង​ពាណិជ្ជកម្ម​បានបញ្ជាក់ថា ទីផ្សារ RCEP គឺជាទីផ្សារដ៏សំខាន់មួយសម្រាប់កម្ពុជាដែលមានចំណែកប្រមាណ ៦១.០៦% នៃទំហំពាណិជ្ជកម្មសរុបរបស់កម្ពុជា។

ទំហំពាណិជ្ជកម្មរបស់កម្ពុជាជាមួយនឹងបណ្តាប្រទេសហត្ថលេខីនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) មានចំនួន ២៦.៥៧ ពាន់លានដុល្លារអាមេរិក ដែលការនាំចេញមានទំហំ ៧.២១ ពាន់លានដុល្លារអាម៉េរិក គឺកើនឡើង ២៧.២៩%៕