ព័ត៌មានជាតិ

មន្ត្រីនគរបាលជាតិខេត្តព្រៃវែង១១នាក់ ត្រូវបណ្ដេញចេញពីក្របខ័ណ្ឌ ក្រោយធ្វើតេស្ដរកឃើញសារធាតុញៀន

បានផុស

១ year មុន

នៅ

ថ្ងៃសុក្រ ២២ ធ្នូ ២០២៣

ដោយ

ភ្នំពេញ ៖ លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានសម្រេចបណ្ដេញមន្ដ្រីនគរបាលជាតិនៃស្នងការនគរបាលខេត្តព្រៃវែងចំនួន១១រូប ពីក្របខ័ណ្ឌមន្ដ្រីនគរបាលជាតិ ក្រោយធ្វើតេស្ដរកឃើញនូវសារធាតុញៀន នេះបើតាមសេចក្តីប្រកាសរបស់ក្រសួងមហាផ្ទៃដែលកម្ពុជាថ្មីទទួលបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីប្រកាសនាយប់ថ្ងៃទី២២ ខែធ្នូ ឆ្នាំ២០២៣ បានឱ្យដឹងថា ក្រសួងមហាផ្ទៃ បណ្ដេញចេញពីក្របខ័ណ្ឌនេះ ជាកម្លាំងស្ថិតក្រោមឱវាទស្នងការដ្ឋាននគរបាលខេត្តព្រៃវែង ចំណុះអគ្គស្នងការដ្ឋាននគរបាលជាតិ ក្រសួងមហាផ្ទៃ។ ចំណែកប្រាក់បៀវត្ស និងរបបឧបត្ថម្ភផ្សេងៗត្រូវកាត់ផ្ដាច់ និងលុបចេញពីក្របខ័ណ្ឌមន្ត្រីនគរបាលជាតិចាប់ពីខែមីនា ឆ្នាំ២០២៤តទៅ។

តាមការបញ្ជាក់ពីស្នងការនៃស្នងការដ្ឋាននគរបាលខេត្តព្រៃវែង លោក ឈឿន ប៊ុនឆន ឱ្យដឹងថា យុទ្ធនាការតេស្តស្វែងរកសារធាតុញៀនលើនគរបាលទូទាំងខេត្តព្រៃវែង ក្រុមការងារបានពិនិត្យរកឃើញនគរបាល “វិជ្ជមាន” សរុប ១២ នាក់។ ក្នុងនោះ វគ្គទី១ ពិនិត្យឃើញចំនួន៩នាក់។ វគ្គទី២ ពិនិត្យឃើញ២ នាក់ និងវគ្គទី៣ ពិនិត្យឃើញ០១ នាក់។

បើតាម លោកបណ្ឌិត ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានឱ្យដឹងថា នេះមិនមែនជាលើកទីមួយទេ ដែលលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីថ្មី សម្រេចបណ្ដេញចេញពីក្របខ័ណ្ឌបន្ទាប់ធ្វើតេស្តឃើញមានសារធាតុញៀន។ លោកបន្តថា ក្នុងនីតិកាលកន្លងទៅ អតីតរដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង ក៏បានអនុវត្តវិធានការនេះយ៉ាងសកម្ម និងតឹងរ៉ឹងផងដែរ។

អ្នកនាំពាក្យរងរូបនេះ សង្កត់ធ្ងន់ថា នៅមានមួយចំនួនបន្តបន្ទាប់ទៀតដែលអង្គភាពចំណុះក្រសួងមហាផ្ទៃបានរកឃើញ និងកំពុងបន្តនីតិវិធីជំនាញ តាមបទបញ្ជារបស់ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕