ក្រុមហ៊ុនជប៉ុន ចង់វិនិយោគចិញ្ចឹមមាន់ផលិតអំបោះ​ធ្វើសម្លៀកបំពាក់នៅកម្ពុជា

សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានលើកឡើងថា មានក្រុមហ៊ុនជប៉ុនមួយ ចង់វិនិយោគលើ​ការ​ចិញ្ចឹមមាន់ នៅកម្ពុជា ដើម្បីកែច្នៃសាច់ និងពងមាន់ផលិតចេញជាអំបោះយកទៅធ្វើជាសម្លៀកបំពាក់(អាវរងា)។ ជប៉ុនអាចធ្វើបានដោយកែច្នៃវត្ថុធាតុដើមមាន់លាយជាមួយសារធាតុគីមីផលិតចេញជាសម្លៀកបំពាក់ ដែល​ជាផ្នែក​មួយកាត់បន្ថយការប្រើប្រាស់ប្លាស្ទិក។ នេះជាការគូសបញ្ជាក់របស់សម្តេច ហ៊ុន ម៉ាណែត។

ក្រុមហ៊ុនជប៉ុន បង្ហាញពីបំណងចង់ចិញ្ចឹមមាន់ផលិតអំបោះធ្វើសម្លៀកបំពាក់នៅកម្ពុជានេះ ធ្វើឡើងនៅក្នុង​ជំនួបជាមួយសម្តេចនាយករដ្ឋមន្រ្តី ហ៊ុន ម៉ាណែត កាលពីពេលថ្មីៗនេះ ខណៈដែលវត្តមានសម្តេច ចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន លើកទី៥០ នៅទីក្រុងតូក្យូ ប្រទេសជប៉ុន។

ការបង្ហាញបំណងរបស់ក្រុមហ៊ុនជប៉ុននេះ ស្របជាមួយរាជរដ្ឋាភិបាល ដែលកំពុងជំរុញឱ្យមាន​ការកាត់បន្ថយការ​ប្រើប្រាស់ប្លាស្ទិកក្នុងផលិតកម្មផ្សេងៗ ងាកមកប្រើប្រាស់វត្ថុធាតុដើមដែលងាយនឹងរំលាយទៅវិញ។

ថ្លែងនៅក្នុងពិធី «បិទសន្និបាតបូកសរុបលទ្ធផលការងារបរិស្ថានឆ្នាំ២០២៣ និងលើកទិសដៅការងារឆ្នាំ២០២៤» របស់ក្រសួងបរិស្ថាន កាលពីថ្ងៃទី ២១ ធ្នូ សម្តេច ហ៊ុន ម៉ាណែត បានលើកឡើងដូច្នេះថា«ខ្ញុំសូម​គាំទ្រពេញ​ទំហឹងក្នុងយុទ្ធនាការកាត់ប​ន្ថយការប្រើប្រាស់ប្លាស្ទិក ដែលក្រសួងបរិស្ថានបានដាក់ចេញ នាពេលថ្មីៗនេះ ជាពិសេសយុទ្ធនាការ«ថ្ងៃនេះខ្ញុំមិនប្រើថង់ប្លាស្ទិកទេ» ដែលរួមចំណែកផ្លាស់ប្តូរឥរិយាបទរបស់ប្រជាជន ចូលរួមកាត់បន្ថយការប្រើប្រាស់ប្លាស្ទិកប្រចាំថ្ងៃនៅកម្ពុជា»។

លើសពីនេះទៀត សម្តេច ជំរុញឱ្យបង្កើតជម្រើសល្អ ដែលធ្វើយ៉ាងណាមិនបង្កឱ្យមានផលប៉ះពាល់ដល់បរិស្ថាន និងរួមចំណែកជាមួយពិភពលោក ដើម្បីឆ្លើយតបទៅនឹងការប្រែប្រួលអាកាសធាតុ ក៏ដូចជាការរក្សាភាពបៃតង នៅលើភពផែនដីសម្រាប់អ្នកជំនាន់ក្រោយ។