ត្រឹម១សប្ដាហ៍ សមត្ថកិច្ចឃាត់បានជនសង្ស័យជាង៣០០នាក់ពាក់ព័ន្ធបទល្មើសគ្រឿងញៀន

រយៈពេល១សប្ដាហ៍​ ក្រសួងមហាផ្ទៃ បានបំបែកសំណុំរឿងគ្រឿងញៀនធំៗចំនួន៣ ក្នុងចំណោមបទល្មើសគ្រឿងញៀនចំនួន១៣៤ករណី ដែលក្នុងនោះ ឃាត់ខ្លួនជនសង្ស័យបាន៣១០នាក់។ នេះបើតាមការឱ្យដឹងដោយលោក ទូច សុខៈ អ្នកនាំពាក្យរងក្រសួងមហាផ្ទៃ។

លោក ទូច សុខៈ បាន​ឱ្យដឹងដូច្នេះថា៖ «គិតចាប់ពីថ្ងៃទី១៧ ដល់ថ្ងៃទី២៣ ខែធ្នូ ឆ្នាំ២០២៣ យ៉ាងហោចណាស់មានជនសង្ស័យចំនួន៣១០នាក់ ត្រូវបានឃាត់ខ្លួនលើបទល្មើសគ្រឿងញៀន១៣៤ករណី ដែលនេះជាលទ្ធផលបង្ក្រាបនៅទូទាំងប្រទេស ដោយសមត្ថកិច្ច​គ្រប់ផ្នែកសំខាន់ៗនៃ​ក្រសួង​មហាផ្ទៃ បានប្រតិបត្តិការប្រកបដោយការទទួលខុសត្រូវ និងស្របតាម​នីតិវិធីកំណត់ដោយច្បាប់ជាធរមាន»។

តាមការសរុបរបាយការណ៍ប្រចាំសប្ដាហ៍របស់អ្នកនាំពាក្យរងរូបនេះ ជនសង្ស័យទាំង៣១០នាក់ ត្រូវបានឃាត់ខ្លួនក្នុងបទល្មើសជួញដូរ និងប្រើប្រាស់គ្រឿងញៀន ដែលភាគច្រើនជាបទល្មើសកម្រិតធន់ល្មម ដោយសមត្ថកិច្ច​នៅតែបន្តតាមដាន បំបែកសំបុក បណ្ដាញ និងមេក្លោង​ តាមជំនាញ និងច្បាប់។

​​លោក ទូច សុខៈ បានបញ្ជាក់ឱ្យដឹងថា មានករណីបង្ក្រាបទ្រង់ទ្រាយធំចំនួន៣​ករណី ដែលក្នុងនោះ ២ករណីកើតឡើងនៅរាជធានីភ្នំពេញ និង​១ករណីទៀតកើតនៅខេត្តព្រៃវែង។ បើតាមអ្នកនាំពាក្យរងរូបនេះ ករណីនៅរាជធានីភ្នំពេញ គឺសមត្ថកិច្ចចាប់បានគ្រឿងញៀនសរុប​ ៦២,៨៤គីឡូក្រាម សារធាតុផ្សំ ៣៥៧,៩០គីឡូក្រាម និង​ឃាត់ខ្លួនបានជនជាតិ វៀតណាម២នាក់ និង​ចិន៣នាក់។ ដោយឡែក សម្រាប់ខេត្តព្រៃវែងវិញ ចាប់គ្រឿងញៀន​បាន​១,៩៩គីឡូក្រាម សារធាតុគីមីផ្សំ ១២,២៨គីឡូក្រាម ឃាត់ខ្លួនជនជាតិវៀតណាម៣នាក់ និង​ខ្មែរម្នាក់។

លោក ទូច សុខៈ អ្នកនាំពាក្យរងក្រសួងមហសផ្ទៃ បានអះអាងថា លទ្ធផលនៃការបង្ក្រាបបទល្មើសគ្រឿងញៀនខាងលើនេះ ​គឺជាការប្រឹងប្រែង និង​អនុវត្តយ៉ាង​ម៉ឹងម៉ាត់របស់​អគ្គស្នងការដ្ឋានគរបាលជាតិ បណ្ដាស្នងការដ្ឋានរាជធានីខេត្ត និងអធិការដ្ឋាន ក៏ដូចជាប៉ុស្តិ៍នគរបាលនៅទូទាំងប្រទេស ហើយ​ការអនុវត្តនេះ គឺជាទិសដៅអាទិភាពទីមួយ ក្នុងចំណោមទិសដៅអាទិភាពទាំង៦ របស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាក់ចេញបន្ទាប់ពីលោកបានកាន់តំណែងនេះ។ ក្នុងទិសដៅអាទិភាពទាំង៦នោះ រួមមាន បញ្ហាគ្រឿងញៀន បទល្មើសព្រហ្មទណ្ឌទូទៅ ក្រុមក្មេងទំនើង បញ្ហាចរាចរណ៍ ការជួញដូរមនុស្ស និងបញ្ហានានាដែលកើតឡើងតាមបណ្ដាព្រំដែនកម្ពុជា៕