ព័ត៌មានជាតិ

ប្រធាន IOM សរសើរក្រសួងការងារ លើយន្តការការពារសិទ្ធិពលករនៅក្រៅប្រទេស

បានផុស

១ year មុន

នៅ

ថ្ងៃចន្ទ ២៥ ធ្នូ ២០២៣

ដោយ

លោកស្រី Kristin Parco ប្រធានបេសកកម្មរបស់អង្គការអន្តរជាតិទេសន្តរប្រវេសន៍ (IOM) ប្រចាំកម្ពុជា បានកោតសរសើរក្រសួងការងារ និងបណ្ដុះបណ្ដាលវិជ្ជាជីវៈ ក្នុងកិច្ចការគាំពារ និងលើកកម្ពស់សិទ្ធិពលករទេសន្តរប្រវេសន៍ ដោយអះអាង ក្រសួង មានគំនិតផ្ដួចផ្ដើម និងយន្តការការពារជាច្រើន ទាំងក្នុងប្រទេស កម្រិតតំបន់ និងអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងទិវាអន្តរជាតិសម្រាប់ទេសន្តរប្រវេសន៍ឆ្នាំ ២០២៣ កាលពីថ្ងៃទី ២២ ខែធ្នូ ឆ្នាំ ២០២៣ នាទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ លោកស្រីបានឲ្យដឹងថា «…ក្រោមការដឹកនាំរបស់ក្រសួងការងារ និងបណ្ដុះបណ្ដាលវិជ្ជាជីវៈ កម្ពុជា មានវឌ្ឍនភាពគួរឱ្យកត់សម្គាល់លើវិស័យការងារ និងពលករទេសន្តរប្រវេសន៍ ដែលបានធ្វើឱ្យវិស័យនេះក្លាយជាយន្តការគន្លឹះជាអាទិភាពមួយក្នុងការលើកកម្ពស់ និងការពារសិទ្ធពលករចំណាកស្រុក។ តាមរយៈយន្តការនេះ កម្ពុជា បានលើកកម្ពស់ និងធ្វើឱ្យប្រសើរឡើងនូវជីវភាពរបស់ពលករតាមរយៈគំនិតផ្ដួចផ្ដើមជាច្រើន និងការពង្រឹងកិច្ចសហប្រតិបត្តិការតំបន់ និងអន្តរជាតិ»។

លោកស្រីបានបន្តគូសបញ្ជាក់ថា ពលករចំណាកស្រុកកម្ពុជា គឺជាកម្លាំងចលករយ៉ាងសំខាន់ក្នុងការជំរុញកំណើនសេដ្ឋកិច្ចជាតិតាមរយៈចំណូលប្រមាណ ២.២ ពាន់លានដុល្លារ ក្នុងរយៈពេល ១ ឆ្នាំៗ ខណៈ កម្ពុជា មានពលរដ្ឋចំណាកស្រុកប្រមាណ ១.៣ លាននាក់ ដែលកំពុងបម្រើការងារនៅប្រទេសថៃ កូរ៉េខាងត្បូង ជប៉ុន ម៉ាឡេស៊ី សិង្ហបុរី កោះហុងកុង និងរាជាណាចក្រអារ៉ាប៊ីសាអូឌីត។

សម្រាប់ លោកស្រី បើទោះបីជាបញ្ហាពលករចំណាកស្រុកជាបញ្ហាអន្តរជាតិ និងមានភាពស្មុគស្មាញ ប៉ុន្តែក្នុងនាម IOM និងអង្គការអន្តរជាតិ ខាងការងារ (ILO) បានត្រៀមខ្លួនរួចជាស្រេចដើម្បីគាំទ្ររាជរដ្ឋាភិបាលកម្ពុជាក្នុងការពង្រឹងការធ្វើចំណាកស្រុកដោយស្របច្បាប់៕