អ្នកនាំពាក្យ៖ កិច្ចសហប្រតិបត្តិការទូទាត់​ឆ្លងដែន​រវាងកម្ពុជា-ចិន នឹងជួយជំរុញកំណើន​ទេសចរ​ប្រទេសទាំងពីរ

កិច្ចសហប្រតិបត្តិការទូទាត់ប្រាក់ឆ្លងដែនតាម QR-Code កម្ពុជា ចិន មានសារៈសំខាន់សម្រាប់វិស័យទេសចរណ៍កម្ពុជា ព្រោះនៅពេលទេសចរចិនចូលមកកម្ពុជា នឹងងាយស្រួលក្នុងការចាយវាយទូទាត់ ដែលកត្តាអាចទាក់​ទាញទេសចរ​ផងដែរ។ នេះបើតាមការលើកឡើងរបស់លោក តុប សុភ័គ រដ្ឋលេខាធិការ និងជាអ្នកនាំពាក្យក្រសួងទេសចរណ៍ នៅរសៀលថ្ងៃទី ២៧ ធ្នូនេះ។

លោក តុប សុភ័គ បានបន្តថា កិច្ច​សហ​ប្រតិ​បត្តិ​ការ​ទូទាត់​សង​ប្រាក់​ឆ្លង​ដែន​តាម ​QR-Code បានជំរុញដល់ការ​ការ​ប្រើ​ប្រាស់​ប្រាក់​រៀល​របស់​កម្ពុជា និង​ប្រាក់​យ័នរ​បស់​ចិន​ ឱ្យមាន​លក្ខណៈកាន់តែ​ទូលំ​ទូលាយ​នៅ​ក្នុង​ប្រទេសទាំងពីរ ហើយកិច្ចសហប្រតិបត្តិការនេះ នឹងជួយពលរដ្ឋ​ដែលប្រើប្រាស់ប្រព័ន្ធបាគង និងមានគណនីធនាគារជាប្រាក់រៀល អាចស្កេន QR Code នៅប្រទេសចិន ដើម្បីទូទាត់លើថ្លៃទំនិញ ​និងសេវាផ្សេងៗបានយ៉ាងងាយ​ស្រួល។ សម្រាប់​ពលរដ្ឋ​ចិន ​ដែល​មក​កម្ពុជា​ ក៏អាច​ទូទាត់​លើការចំណាយផ្សេងៗ តាមរយៈការស្កេននូវប្រព័ន្ធ KH QR បានផងដែរ។

លោក តុប សុភ័គបានបន្តទៀតថា កិច្ចសហប្រតិបត្តិការនេះ នឹងជួយសម្រួលការទូទាត់របស់ពលរដ្ឋរវាងប្រទេសចិន និងកម្ពុជា​ ឱ្យកាន់តែប្រសើរ​ និងមិនខាតបង់នូវអត្រាប្តូរប្រាក់។ ចំណុចសំខាន់នៃកិច្ចសហប្រតិបត្តិការ​នេះ គឺការជំរុញ​ការប្រើប្រាស់ប្រាក់រៀល។ 

លោកបានបន្ថែមទៀតថា« ពលរដ្ឋកម្ពុជាទៅស្រុកគេត្រូវមានគណនីជាលុយរៀល ទើបអាចចាយតាមប្រព័ន្ធ KHQR Code នេះបាន  ហើយពេលគេមកខ្មែរវិញ អាជីវករយើង​ គឺត្រូវតែមាន QR Code ជាលុយរៀល​ ដើម្បីឱ្យចិន​ទូទាត់ពី​លុយយ័នមកជាលុយរៀល “ខាងចិន គឺគេជំរុញការប្រើប្រាស់លុយយ័ននៅស្រុកគេ ហើយខាងខ្មែរ​យើងក៏ជំរុញ​ការប្រើ​ប្រាស់លុយរៀលនៅក្នុងស្រុកយើង ផងដែរ»។​

លោក តុប សភ័គ ចាត់ទុកកិច្ចសហប្រតិបត្តិការនេះពិតជាមានសារៈសំខាន់សម្រាប់វិស័យ ទេសចរណ៍កម្ពុជា ព្រោះនៅពេលទេសចរចិនមកកម្ពុជា  នឹងងាយស្រួលចាយវាយទូទាត់ ដែលជាកត្តាអាចទាក់ទាញទេសចរ​មកបន្ថែមទៀត។

សូមបញ្ជាក់ថា កាលពីរសៀលថ្ងៃទី២២ ខែធ្នូ ឆ្នាំ២០២៣ ធនាគារជាតិនៃកម្ពុជា និង ក្រុមហ៊ុន UnionPay International បានរៀបចំពិធីសម្ពោធជាផ្លូវការនៃការទូទាត់ QR Code ឆ្លងព្រំដែនរវាងប្រទេសទាំងពីរ ក្រោម​អធិបតី​ភាពលោកស្រីបណ្ឌិត ជា សេរី ទេសាភិបាលធនាគារជាតិនៃកម្ពុជា លោក វ៉ាង វិនធៀន ឯកអគ្គរដ្ឋទូត​វិសាមញ្ញ និងពេញសមត្ថភាព នៃសាធារណៈរដ្ឋប្រជាមានិតចិន ប្រចាំព្រះរាជាណាចក្រកម្ពុជា៕

អត្ថបទ ៖ សំអឿន