ព័ត៌មានជាតិ

ឯកឧត្ដម ហ៊ុន ម៉ានី មិនបាននាំយកក្រុមការងារបច្ចេកទេសមកក្រសួងមុខងារសាធារណៈ ឡើយ

បានផុស

៩ ខែ មុន

នៅ

ថ្ងៃពុធ ២៧ ធ្នូ ២០២៣

ដោយ

អ៊ិន ពិសី

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ មិនបាននាំយកក្រុមការងារបច្ចេកទេសមកក្រសួងមុខងារសាធារណៈឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែង ថ្មីៗ នេះ ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានជួបសំណេះសំណាលជាមួយនឹងអគ្គលេខាធិការដ្ឋាន និងអគ្គនាយកដ្ឋានបច្ចេកទេសនានា របស់ក្រសួងមុខងារសាធារណៈ ជាបន្តបន្ទាប់ និងទើបតែត្រូវបានបញ្ចប់កាលពីម្សិលមិញនេះ។

ទន្ទឹមនេះ អ្វីដែលជាការកត់សម្គាល់ចេញពីជំនួបកន្លងមកនោះ និងតាំងពីពេល ឯកឧត្ដម ហ៊ុន ម៉ានី កាន់តួនាទី-ភារកិច្ច ជារដ្ឋមន្ត្រីក្រសួងមុខងារសាធារណៈ ឯកឧត្ដម មិនបាននាំយកក្រុមការងារបច្ចេកទេសមកក្រសួងមុខងារសាធារណៈឡើយ។ ក្រៅពីក្រុមការងារ និងមន្ត្រីនៅខុទ្ទកាល័យ មានតែក្រុមការងារក្នុងកម្រិតនយោបាយតែប៉ុណ្ណោះដែលមានវត្តមានជាមួយ ឯកឧត្ដម នៅក្រសួងមុខងារសាធារណៈ។

រាល់ជំនួបនីមួយៗ ឯកឧត្ដម ហ៊ុន ម៉ានី តែងតែបានលើកឡើងថា ការធ្វើបែបនេះ ដោយសារឯកឧត្ដម មានទំនុកចិត្តខ្ពស់ និងជឿជាក់លើសមត្ថភាពរបស់ក្រុមការងារបច្ចេកទេសទាំងអស់ដែលមានស្រាប់នៅក្រសួងមុខងារសាធារណៈ ព្រោះក្រុមការងារទាំងអស់គ្នា សុទ្ធតែមានចំណេះ ជំនាញបច្ចេកទេស និងបទពិសោធន៍ជាច្រើនឆ្នាំលើការងាររួចមកហើយ។

ឯកឧត្ដម បានលើកឡើងបន្ថែមថា អ្វីដែលយើងបន្តធ្វើ គឺ រួមសហការគ្នាជាមួយការអភិវឌ្ឍសមត្ថភាពជាបន្តបន្ទាប់ ក្នុងគោលដៅ កែប្រែទស្សនវិស័យរបស់ សម្ដេចធិបតី ជាសមិទ្ធកម្មការងារពិតប្រាកដ ហើយឆ្លើយតបជាមួយការងារកែទម្រង់រដ្ឋបាលសាធារណៈមានចែងក្នុងយុទ្ធសាស្ត្របញ្ចកោណ ដំណាក់កាលទី ១។

គួររំលឹកថា កិច្ចប្រជុំកន្លងមក ត្រូវបានរៀបចំឡើងក្នុងគោលបំណងឈ្វេងយល់ពីគ្នាទៅវិញទៅមក ស្តាប់របាយការណ៍ និងបទពិសោធន៍ ព្រមទាំងជាឱកាសសម្រាប់ការលើកឡើងនូវបញ្ហាប្រឈមដែលក្រុមការងារបានជួបប្រទះកន្លងមក ដើម្បីសិក្សា និងស្វែងរកដំណោះស្រាយជាមួយគ្នា ហើយឆ្លើយតបជាមួយការងារកំណែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី ៧ នៃរដ្ឋសភា៕