បិទបណ្តោះអាសន្ន មន្ទីរសម្រាកព្យាបាលមេសុងមេឌីកាល់ នៅខណ្ឌ ៧មករា

ក្រសួងសុខាភិបាល បានសម្រេចបិទជាបណ្តោះអាសន្ន មន្ទីរសម្រាកព្យាបាលឯកជនឈ្មោះ មេសុងមេឌីកាល់ ដែលមានទីតាំងនៅ ផ្ទះលេខ០៨ ផ្លូវលេខ១២២ សង្កាត់មិត្តភាព ខណ្ឌ៧មករា រាជធានីភ្នំពេញ ដោយមូលហេតុ អវត្តមានអ្នកទទួលខុសត្រូវ និងផ្លាស់ប្តូរបុគ្គលិកមិនបានជូនដំណឹងទៅក្រសួងសុខាភិបាល។

យោងតាមសេចក្តីជូនដំណឹងរបស់ ក្រសួងសុខាភិបាល ដែលទើបទទួលបាន នៅថ្ងៃទី២៨ ខែធ្នូ នេះ បានឱ្យដឹងថា ក្រសួងសុខាភិបាលបានព្យួរ សេចក្តីសម្រេចលេខ ០៤៥/២៣ អបស/មព ចុះថ្ងៃទី០១ ខែមីនា ឆ្នាំ២០២៣ របស់ក្រសួងសុខាភិបាល។

ទន្ទឹមនឹងនេះ ក្រសួងក៏បានណែនាំដល់ អគ្គនាយកបច្ចេកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាល នៃរដ្ឋបាលរាជធានីភ្នំពេញ និង លោកវេជ្ជបណ្ឌិត តូច ស៊ីផាន់ណាល់ មានភារកិច្ចអនុវត្តសេចក្តីសម្រេចនេះ តាមភារកិច្ចរៀងៗខ្លួនឱ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ៕