សំណង់បុរីកំពុងសាងសង់ជាង៣០០កន្លែង និងអគារចាប់ពី៥ជាន់ឡើងជិត ២ពាន់កន្លែង នៅរាជធានីភ្នំពេញ

បច្ចុប្បន្ន ទោះបីសេដ្ឋកិច្ចជាតិត្រូវបានរាំងស្ទះដោយវិបត្តិជាសកល និងភាពមិនច្បាស់លាស់នៃសេដ្ឋកិច្ចពិភព​លោកយ៉ាងណាក្តី ក៏គម្រោងអភិវឌ្ឍជាច្រើន បាននិងកំពុងដំណើរការសាងសង់នៅក្នុងរាជធានីភ្នំពេញ។ នេះជាការបញ្ជាក់របស់លោក ឃួង ស្រេង អភិបាលរាជធានីភ្នំពេញ។

ថ្លែងនៅក្នុងពិធី “បើកសន្និបាតបូកសរុបលទ្ធផលការងារ ឆ្នាំ២០២៣ និងទិសដៅអនុវត្តការងារ ឆ្នាំ២០២៤ របស់​រដ្ឋបាល​រាជធានីភ្នំពេញ” លោក ឃួង ស្រេង បានឱ្យដឹងថា នៅរាជធានីភ្នំពេញមានសំណង់បុរីចំនួន ៣១០ កន្លែង អគារខ្ពស់ៗចាប់ពីប្រាំជាន់ឡើងទៅ មានចំនួន ១៧៧៧ អគារ កំពុងដំណើរការសាងសង់ ដោយក្នុងនោះ រដ្ឋបាលរាជធានី បានពិនិត្យលើឯកសារស្នើសុំលិខិតអនុញ្ញាតសាងសង់ក្នុងគម្រោងថ្មីចំនួន ៥៣៦ គម្រោង លើផ្ទៃក្រឡាសំណង់សរុប ២៦៩ ១៦៦ ម៉ែត្រការ៉េ ដែលមានទំហំទុនវិនិយោគប៉ាន់ស្មានប្រមាណ ១៣២ លានដុល្លាអាមេរិក។

ដោយឡែក អភិបាលរាជធានីភ្នំពេញ បានបញ្ជាក់ថា រោងចក្រវិនិយោគក្នុងរាជធានីភ្នំពេញបច្ចុប្បន្នមានចំនួន ៧៦៣ រោងចក្រ ក្នុងនោះ រោងចក្រដែលបានស្នើសុំចុះបញ្ជីនៅអនុគណៈកម្មាធិការវិនិយោគរាជធានីភ្នំពេញមានចំនួន ៨១ រោងចក្រ កើនឡើង ១៨ រោងចក្រ មានតម្លៃប៉ាន់ស្មានផលិតផលសរុបជាង ៦,៥ ពាន់លានដុល្លាអាមេរិក ពោលគឺកើន​ឡើងយ៉ាងគំហុកក្នុងអត្រាប្រមាណ២១៨% បើធៀបនឹងតម្លៃប៉ាន់ស្មានផលិតផលសរុបក្នុងឆ្នាំ២០២២ កន្លងទៅ។

លោក ឃួង ស្រេង បានលើកឡើងថា ការកើនឡើងនេះ បង្ហាញឱ្យឃើញពីសញ្ញាណវិជ្ជមាននៃការវិនិយោគ ក្រោយ​ពេល​បើកដំណើរការសេដ្ឋកិច្ច-សង្គមពេញលេញឡើងវិញ លើគ្រប់វិស័យ នារយៈពេល ២ ឆ្នាំចុងក្រោយនេះ៕

ការកើនឡើងនៃវិស័យសំណង់អគារនេះ ក៏ជាផ្នែកមួយជួយជំរុញកំណើនសេដ្ឋកិច្ចជាតិផងដែរ។ ធនាគារ​ពិភពលោក​ បានព្យាករ​ថា​ កំណើនសេដ្ឋកិច្ច​កម្ពុជា ​នឹង​កើន​ដល់ ​៥,៨ភាគរយ​ ក្នុង​ឆ្នាំ​២០២៤​ និង​៦,១ ភាគរយ ​នៅ​ឆ្នាំ​២០២៥​ ជាមួយការ​រំពឹង​ទុក​អំពី​ការ​កើន​ឡើង​នូវ​ការ​វិនិយោគ​ហេដ្ឋា​រចនាសម្ព័ន្ធ​ និង​អត្ថប្រយោជន៍​ដែល​នឹង​កើត​ចេញពីកិច្ច​ព្រម​ព្រៀង​ពាណិជ្ជ​កម្ម​នានា​ដែល​កម្ពុជា ​មាន​ជាមួយ​បណ្តា​ប្រទេស​នៅក្នុងតំបន់​៕