ព័ត៌មានជាតិ

ឃាត់ខ្លួនក្មេងស្ទាវមួយក្រុម ប្រើដាវកាប់ប្លន់ម៉ូតូ នៅតាកែវ

បានផុស

៤ years មុន

នៅ

ថ្ងៃសុក្រ ១២ កុម្ភៈ ២០២១

ដោយ

ក្រុមក្មេងបង្កអសន្តិសុខសង្គម ដែលបានធ្វើសកម្មភាពកាប់ប្លន់ម៉ូតូពីជនរងគ្រោះកាលពីប៉ុន្មានថ្ងៃមុន ត្រូវបានប៉ូលិសស្រុកត្រាំកក់បង្ក្រាបបានជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយកើតហេតុកាប់ប្លន់ម៉ូតូរយៈពេល៣ថ្ងៃ កម្លាំងជំនាញអធិការដ្ឋាននគរបាលស្រុកត្រាំកក់ ក្រោមការចង្អុលបង្ហាញពីលោកឧត្តមសេនីយ៍ទោ សុខ សំណាង ស្នងការនគរបាលខេត្តនិងមានការសម្របសម្រួលនីតិវិធីពីលោកព្រះរាជអាជ្ញាអមសាលាដំបូងខេត្តតាកែវ បានស្រាវជ្រាវបង្ក្រាបមុខសញ្ញាពាក់ព័ន្ធអំពើលួចមានស្ថានទម្ងន់ទោស(កាប់ប្លន់ម៉ូតូ)បានជាបន្តបន្ទាប់។

លោក ឌុក ធីយ៉ា អធិការនគរបាលស្រុកត្រាំកក់បានឲ្យដឹងថា នៅថ្ងៃទី០៧ ខែកុម្ភៈ ឆ្នាំ២០២១ វេលាម៉ោង២៣និង៤០នាទី នៅលើផ្លូវជាតិលេខ៣ ត្រង់ចំណុចស្ពានយាយឡ ស្ថិតនៅក្នុងភូមិយាយឡ ឃុំត្រាំកក់ ស្រុកត្រាំកក់ មានករណីកាប់ប្លន់មួយកើតឡើង ដែលបង្កដោយជនសង្ស័យមួយក្រុម មានគ្នាចំនួន៥នាក់ ជិះម៉ូតូ២គ្រឿងប្រដាប់ដោយដាវស្ទាក់កាប់ទៅលើជនរងគ្រោះ២នាក់ ខណៈដែលជនរងគ្រោះធ្វើដំណើរតាមផ្លូវត្រឡប់មកពីកម្មវិធីឡើងផ្ទះបងប្អូននៅផ្សារប័ង្កសី ប្លន់យកម៉ូតូ០១គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០១២ ឡើងតែម ឆ្នាំ២០២០ បិតស្គុតស ពាក់ស្លាកលេខភ្នំពេញ 1BL.0155 ហើយបានគេចខ្លួនបាត់អស់។

ក្រោយកើតហេតុ កម្លាំងជំនាញបានចុះប្រតិបត្តិការស្រាវជ្រាវរហូតដល់ថ្ងៃទី១០ ខែកុម្ភៈ ឆ្នាំ២០២១ កម្លាំងជំនាញបានកំណត់មុខសញ្ញា និងឃាត់ខ្លួនជនសង្ស័យម្នាក់ មានឈ្មោះ មាស ប៊ុននី ភេទប្រុស អាយុ១៩ឆ្នាំ រស់នៅភូមិតាលឿ ឃុំឧត្តមសុរិយា ស្រុកត្រាំកក់។ លុះថ្ងៃទី១១ ខែកុម្ភៈឆ្នាំ ២០២១ កម្លាំងជំនាញបានបន្តស្រាវជ្រាវឃាត់ខ្លួនជនសង្ស័យចំនួន៤នាក់បន្ថែមទៀតមាន៖ ១ឈ្មោះ យន់ វឌ្ឍនា ហៅរ៉ា ភេទប្រុសអាយុ១៥ឆ្នាំ នៅភូមិបាក់កូដ ឃុំលាយបូរ ស្រុកត្រាំកក់។ ទី២ឈ្មោះ ង៉ែត សុខសំបូរ ភេទប្រុស អាយុ១៨ឆ្នាំ នៅភូមិតាលឿ ឃុំឧត្តមសុរិយា ស្រុកត្រាំកក់។ ទី៣ឈ្មោះ អៀង សុភ័ក្រ ភេទប្រុស អាយុ២០ឆ្នាំ នៅភូមិព្រៃរំដេង ឃុំអង្គតាសោម ស្រុកត្រាំកក់។ និងទី៤ឈ្មោះ ផល ថុលសុណៃទ្រី ភេទប្រុស អាយុ១៦ឆ្នាំ រស់នៅភូមិធ្យា ឃុំលាយបូរ ស្រុកត្រាំកក់។ ចំណែកវត្ថុតាងដកហូតបានមាន ម៉ូតូចំនួន០៤គ្រឿង ក្នុងនោះម៉ូតូមួយគ្រឿងជារបស់ជនរងគ្រោះ ត្រូវបានប្រគល់ជូនម្ចាស់ដើមវិញ។