ទេសរដ្ឋមន្ត្រី ឱម យ៉ិនទៀង បានផ្ដាំយុវជនជាអ្នកបន្តវេនត្រូវរក្សាចាស់ ពង្រីកថ្មី

លោកទេសរដ្ឋមន្ត្រី ឱម យ៉ិនទៀង បានថ្លែងថា យុវជន គឺជាធនធានសង្គមដ៏សំខាន់ ហើយយុវជនដែលជាអ្នកបន្តវេនរបស់សង្គម ត្រូវប្រកាន់យកគោលការណ៍ «រក្សាចាស់ ពង្រីកថ្មី»។ លោកទេសរដ្ឋមន្ត្រីថ្លែងបែបនេះ នៅចំពោះមុខក្រុមយុវជន ស.ស.យ.ក ខេត្តកំពង់ស្ពឺ ក្នុងពិធីបើកវេទិកាយុវជនស្អាតស្អំ ក្រោមប្រធានបទ «យុវជនបន្តវេន»។ 

លោក ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ បានថ្លែងដូច្នេះថា៖ «យុវជន គឺជាកម្លាំងស្នូល ជាធនធានសង្គម ហើយយុវជនស្អាតស្អំ ត្រូវក្តាប់ឱ្យជាប់យុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា អាណត្តិទី៧ ជាពិសេសយុវជនជាអ្នកបន្តវេន ត្រូវរក្សាចាស់ ពង្រីកថ្មី»។

បើតាមការគូសបញ្ជាក់របស់លោកទេសរដ្ឋមន្ត្រី នៅក្នុងសង្គមជាតិ គឺចាំបាច់ណាស់ការចូលរួមពីយុវជន ដែលយុវជន គឺជាធនធានស្នូលក្នុងការកំណត់អនាគតរបស់សង្គមជាតិ ហើយការផលិតធនធានយុវជនត្រូវប្រកបដោយការអប់រំខ្ពស់ ភាពឈ្លាសវៃ និងបណ្តុះនូវស្មារតីស្នេហាជាតិមាតុភូមិ និងត្រូវមានសាមគ្គីភាពជាធ្លុងមួយ។

លោកទេសរដ្ឋមន្ត្រី បានបន្តថា យុវជនត្រូវមានចំណេះដឹងសមតាមតម្រូវការរបស់សង្គម ប្រកបដោយបទពិសោធន៍ ភាពឈ្លាសវៃ ចេះស្គាល់កាលៈទេសៈ និងចេះបត់បែនតាមសភាពការណ៍។ ក្នុងនោះ លោកទេសរដ្ឋមន្ត្រី ក៏បានលើកឡើងនូវកត្តាសំខាន់ៗរបស់យុវជន គឺសីលធម៌ ភាពស្មោះត្រង់ មានឧត្តមគតិ គិតប្រយោជន៍រួមជាធំ មានមនសិការការងារ ក្លាហាន អំណត់ព្យាយាម ហ៊ានទទួលខុសត្រូវ និងគោររពច្បាប់ ការពារយុត្តិធម៌។

ជាមួយគ្នានេះ លោកទេសរដ្ឋមន្ត្រី ក៏បានបកស្រាយពីជំនាញផ្នែកទន់ (Soft Knowledge, Soft Skill) ដែលជាលក្ខណៈទូទៅមិនជាក់លាក់ចំពោះការងារណាមួយ ដែលជួយបុគ្គលិកឱ្យពូកែនៅកន្លែងធ្វើការណាមួយ។ លោក លើកឡើងថា ជំនាញទន់ បានរួមបញ្ចូលដោយស្នេហាជាតិ សីលធម៌ យុត្តិធម៌ ការប្រាស្រ័យទាក់ទង ការធ្វើការងារជាក្រុម និងការសម្របខ្លួន ដែលជារឿយៗត្រូវបានគេហៅថា ជាជំនាញដែលអាចផ្ទេរបាន ឬអន្តរបុគ្គល។ លោកទេសរដ្ឋមន្ត្រី ចាត់ទុកជំនាញទន់នេះមានសារសំខាន់សម្រាប់ភាពជោគជ័យក្នុងអាជីព៕