ចាប់បានជ្រូកឆ្លងជំងឺប៉េស្តអាហ្វ្រិកដឹកមកពីថៃ៣០ក្បាល

ឈ្មួញដឹកសត្វជ្រូកចំនួន ៣០ ក្បាលតាមច្រករបៀងពីប្រទេសថៃចូលមកកម្ពុជា ត្រូវសមត្ថកិច្ចចាប់បាន ហើយយកទៅដុតកម្ទេចចោល បន្ទាប់ពីមន្ត្រីជំនាញរកឃើញជ្រូកទាំងនោះមានឆ្លងជំងឺប៉េស្តអាហ្វ្រិកនៅព្រឹកថ្ងៃទី ១២ ខែកុម្ភៈ ឆ្នាំ ២០២០។

ការចាប់រឹបអូសជ្រូកនាំចូលខុសច្បាប់នេះ ស្ថិតនៅចំណុច ភូមិខ្លាកូនថ្មី សង្កាត់កំពង់ស្វាយក្រុងសិរី​សោភ័ណ ខេត្តបន្ទា​យ​មានជ័យ ក្រោមការដឹកនាំដោយលោក ហ៊ុន សារ៉ាត់ ប្រធានក្រុមការងារត្រួតពិនិត្យ និងបង្ក្រាបបទល្មើសចលនាសត្វ។

កាលពីថ្ងៃទី ៧ ដើមខែនេះ សមត្ថកិច្ចបានចុះឆ្មក់ស្ទាក់ចាប់បទល្មើសផលិតកម្មសត្ថបានចំនួន ២ ករណី ដោយបង្ក្រាបរថយន្តដឹកជ្រូក ២០ ក្បាល តាមច្រករបៀងអូរបីជាន់ ដែលករណីនេះជាការនាំចូលសត្វជ្រូក និងការដឹកជញ្ជូនគ្មានលិខិតអនុញាត។

និងករណីទី២ សមត្ថកិច្ចបានឃាត់គោយន្ត១គ្រឿងដឹកសត្វជ្រូករស់ចំនួន១០ក្បាល តាមច្រករបៀងចំការគក្នុងភូមិចម្ការគ ឃុំចម្ការគ ស្រុកស្វាយចេក ខេត្តបន្ទាយមានជ័យ ដោយគ្មានលិខិតអនុញ្ញាតអ្វីទាំងអស់៕

អត្ថបទ៖ វ៉ាន់ ណាង