២ថ្ងៃ មុនឆ្លងឆ្នាំសកល ខេត្តបាត់ដំបងទទួលបានភ្ញៀវមកកម្សាន្ត១០មុឺននាក់

រយ:ពេល២ថ្ងៃមុនឆ្លងឆ្នាំសកល ខេត្តបាត់ដំបងទទួលបានភ្ញៀវទេសចរចំនួនជិត១០មុឺននាក់ ខណ:រដ្ឋបាលខេត្ត និងមន្ទីរទេសចរខេត្ត បាននិងកំពុងរៀបចំកម្មវិធីអុំទូកអាស៊ាន ពិព័រណ៍តាំងម្ហូបអាហារ ការប្រគុំតន្ត្រី និងស្តង់លក់ទំនិញ ដើម្បីទាក់ទាញភ្ញៀវឱ្យចូលមកកម្សាន្តនាថ្ងៃឆ្លងឆ្នាំ។

យោងតាមរបាយការណ៍របស់ប្រធានមន្ទីរទេសចរណ៍ខេត្តបាត់ដំបង លោក អ៊ុច អ៊ុភីនីហ្សារ៉ា ភ្ញៀវទេសចរដែលបានមកកម្សាន្តក្នុងថ្ងៃទី២៩ ខែធ្នូ ឆ្នាំ២០២៣ មានចំនួន៣៧ ៨៦៧នាក់ ក្នុងនោះភ្ញៀវជាតិចំនួន៣៧ ៥៨០ និងភ្ញៀវអន្តរជាតិចំនួន២៨៧។ ចំនួននេះមានការកើនឡើង ៥២២.៧០% បើធៀបនឹងឆ្នាំ២០២២។

ដោយឡែកសម្រាប់ស្ថិតិភ្ញៀវទេសចរ ក្នុងថ្ងៃទី៣០ ខែធ្នូ ឆ្នាំ២០២៣ ខេត្តបាត់ដំបងទទួលបានភ្ញៀវទេសចរណ៍សរុបចំនួន៥១ ៩៧០ នាក់ ក្នុងនោះភ្ញៀវជាតិ មានចំនួន ៥១ ៦៦០ នាក់ និងភ្ញៀវអន្តរជាតិមានចំនួន ៣១០នាក់។ ចំនួននេះមានការកើនឡើង ១១.៣៤% បើធៀបនឹងឆ្នាំ២០២២៕

 អត្ថបទ: សោ និយមរ័ត្ន