រាជរដ្ឋាភិបាល ដំឡើងប្រាក់សោធនអតីត​មន្រ្តីរាជការដល់ជាង ៨២ម៉ឺនរៀល ក្នុងឆ្នាំ ២០២៤

ប្រាក់សោធនអប្បបរមាប្រចាំខែរបស់អតីតមន្ត្រីរាជការស៊ីវិល និងអតីតយុទ្ធជន(អតីតយោធិន និង អតីតមន្ត្រីនគរបាល​ជាតិ) ត្រូវបានដំឡើងពី ៧៧ ម៉ឺនរៀល នៅឆ្នាំ ២០២៣ ដល់ ៨២,៥ ម៉ឺនរៀល នៅឆ្នាំ ២០២៤។ នេះបើយោងតាម​ច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ ២០២៤។

យោងតាមច្បាប់នេះ បានបញ្ជាក់ថា រាជរដ្ឋាភិបាលនឹងដំឡើងប្រាក់សោធន ព្រមទាំងនឹងធ្វើសមាហរណកម្ម ប្រាក់​សោធន​តាមប្រព័ន្ធបៀវត្សចាស់ ចូលទៅក្នុងប្រព័ន្ធបៀវត្សថ្មី ដើម្បីដោះស្រាយបញ្ហាគម្លាត រវាងអ្នកចូលនិវត្តចាស់ និងថ្មី ឱ្យបានចប់នៅក្នុងឆ្នាំ ២០២៤ ផងដែរ។

តាមរយៈ វិធានការនេះ ថវិកាចំនួន ១៨១ ប៊ីលានរៀល ត្រូវបានគ្រោងសម្រាប់ការដំឡើងប្រាក់សោធន និងកាត់បន្ថយ​គម្លាតនេះនៅឆ្នាំ ២០២៣ និង ថវិកាចំនួន ១០០ ប៊ីលានរៀល ត្រូវបានគ្រោង សម្រាប់ឆ្នាំ ២០២៤។

កាលបរិច្ឆេទសម្រាប់ការអនុវត្តការដំឡើងប្រាក់បៀវត្សមូលដ្ឋាន និងប្រាក់បំណាច់ មុខងារ ជូនដល់មន្ត្រីរាជការ ព្រមទាំងការដំឡើងប្រាក់ឧបត្ថម្ភប្រចាំខែ សម្រាប់មន្ត្រីជាប់កិច្ចសន្យា និងការដំឡើងប្រាក់សោធនប្រចាំខែជូន​អតីតមន្ត្រីរាជការស៊ីវិល និងអតីតយុទ្ធជន ក៏ដូចជា ប្រាក់ឧបត្ថម្ភផ្សេងៗ នឹងត្រូវកំណត់ដោយ​អនុក្រឹត្យរបស់រាជ​រដ្ឋាភិបាល នាពេលខាងមុខ។ លើសពីនេះ សម្រាប់ឆ្នាំ ២០២៤ នេះដែរ រាជរដ្ឋាភិបាលបានគ្រោងថវិកាចំនួន ៤៩២ ប៊ីលានរៀល សមមូលនឹងប្រមាណ ១២០ លានដុល្លារអាមេរិក។ ដោយឡែក សម្រាប់ការពង្រឹងសមត្ថភាព​រដ្ឋបាលសាធារណៈ ដោយផ្តោតជាសំខាន់លើការពង្រឹងគុណភាព ប្រសិទ្ធភាព និងសមិទ្ធកម្មរបស់មន្ត្រី និងស្ថាប័ន តាម​រយៈ​ការលើកទឹកចិត្តចំពោះមន្ត្រីដែលមានគុណវុឌ្ឈ ដែលកិច្ចការនេះ នឹងស្ថិតក្រោមការដឹកនាំផ្ទាល់ ពីសំណាក់​ប្រមុខ​រាជរដ្ឋាភិបាល។

ជាមួយគ្នានេះ, រាជរដ្ឋាភិបាល ក៏បានគ្រោងថវិកាចំនួន ៥៥ ប៊ីលានរៀល សម្រាប់ការថែទាំសុខភាពមន្ត្រីរាជការស៊ីវិល កងកម្លាំងប្រដាប់អាវុធ និងនិវត្តជន ព្រមទាំងបានបន្តគ្រោង ថវិកាចំនួន ៦ ប៊ីលានរៀល សម្រាប់របបសន្តិសុខ​សង្គមផ្នែក​ហានិភ័យការងារជូនមន្ត្រីសាធារណៈផងដែរ៕