ព័ត៌មានជាតិ

ត្រឹមមួយថ្ងៃឆ្លងឆ្នាំ យានយន្តប្រើប្រាស់ផ្លូវល្បឿនលឿនមានជាង ៣ ម៉ឺនគ្រឿង ខណៈរថយន្តភាគតិចមានបំពាក់ឧបករណ៍ចេញចូលស្វ័យប្រវត្តិ

បានផុស

១ year មុន

នៅ

ថ្ងៃអង្គារ ២ មករា ២០២៤

ដោយ

ការធ្វើចរាចរណ៍លើផ្លូវល្បឿនលឿនភ្នំពេញខេត្តព្រះសីហនុ ក្នុងឱកាសថ្ងៃឆ្លងឆ្នាំសកលរយៈពេល ៣ ថ្ងៃ រាប់ចាប់ពីថ្ងៃ ៣០ ធ្នូ ២០២៣ ដល់ថ្ងៃ ០១ ខែមករា ២០២៤ មានជាង ៨ ម៉ឺន ៤ ពាន់គ្រឿង។ ដោយឡែកត្រឹមមួយថ្ងៃឆ្លងឆ្នាំ ថ្ងៃ ១ មករា ឆ្នាំ ២០២៤ មានយានយន្តជាង ៣ ម៉ឺនគ្រឿង បានធ្វើដំណើរលើផ្លូវល្បឿនលឿនភ្នំពេញខេត្តព្រះសីហនុ មានការកើនឡើងដល់ជាង ៥០%។

លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការនិងដឹកជញ្ជូនបានឲ្យកម្ពុជាថ្មីដឹងថា ជាការកត់សម្គាល់ចំនួនចរាចរណ៍យានយន្តប្រើប្រាស់នៅលើផ្លូវល្បឿនលឿនមានការកើនឡើងខ្លាំងនៅឱកាសថ្ងៃឆ្លងឆ្នាំសកល ២០២៤ បើប្រៀបធៀបឆ្នាំ ២០២៣។

ចរាចរណ៍យានយន្តថ្ងៃឆ្លងឆ្នាំសកលកាលថ្ងៃ ០១ ខែមករា ឆ្នាំ ២០២៣ មានត្រឹមតែជាង ២ ម៉ឺន ៣ ពាន់គ្រឿងខណៈឆ្នាំ ២០២៤ នៅថ្ងៃទី ១ ខែមករា ត្រឹមមួយថ្ងៃមានចរាចរណ៍យានយន្តរហូតដល់ ៣ ម៉ឺន ៣ ពាន់ គ្រឿងពោលកើនឡើងរហូតដល់ ៥០%។ បើរាប់ចាប់ពីថ្ងៃ ៣០ ធ្នូ ២០២៣ ដល់ថ្ងៃ ០១ ខែមករា ២០២៤ ចំនួនយានយន្តសរុបមានជាង ៨ ម៉ឺន ៤ ពាន់ដែលបានប្រើប្រាស់លើផ្លូវល្បឿនលឿនភ្នំពេញខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កំណើនចរាចរណ៍ជាទីកត់សម្គាល់នេះ ជាកត្តាមួយដែលនាំឲ្យមានការកកស្ទះ ខណៈដែលអ្នកប្រើប្រាស់យានយន្តដែលប្រើប្រាស់ផ្លូវល្បឿនលឿនពី ៣០ ទៅ ៤០% មានបំពាក់ឧបករណ៍ OBU សម្រាប់ចេញចូលតាមច្រក ETC ដែលជាច្រកចេញចូលរហ័ស និងមួយចំនួនតូចប្រើប្រាស់ច្រក ANPR ដែលបញ្ចូលប្រាក់តាមផ្លាកលេខដើម្បីកាត់បន្ថយការរង់ចាំនៅច្រកចេញ។ នេះបើតាមមន្រ្តីអ្នកនាំពាក្យក្រសួងសាធារណការនិងដឹកជញ្ជូន។

យ៉ាងណាមិញ លោក ហ៊ាង សុទ្ធាយុត្តិ អះអាងថា នៅមានអ្នកបើកបរមួយចំនួនធំនៅបន្តប្រើប្រាស់ច្រក NTC ដែលត្រូវយកកាតនៅច្រកចូលនិងប្រគល់កាតបង់ប្រាក់នៅច្រកចេញ ដែលជាកត្តាមួយធ្វើឲ្យការចេញចូលនៅផ្លូវល្បឿនលឿនត្រូវរង់ចាំយូរនិងបង្កឲ្យមានការកកស្ទះ។ បន្ថែមពីនេះអ្នកបើកបរមួយចំនួនក៏នៅមិនទាន់យល់ច្បាស់ពីការប្រើប្រាស់គន្លងច្រកទាំង ៣ ឲ្យបានត្រឹមត្រូវ។

លោកក្រើនរំលឹកដល់ពលរដ្ឋគោរពច្បាប់ចរាចរណ៍កុំបើកបរបញ្ច្រាស។ ជាមួយគ្នានេះដើម្បីចៀសវាងការកកស្ទះ លោកណែនាំអ្នកប្រើប្រាស់ផ្លូវល្បឿនលឿន អាចស្វែងរកការបំពាក់ឧបករណ៍ OBU ដែលអាចរកបាននៅច្រកចេញចូលផ្លូវល្បឿនលឿន ឬក៏ស្នើសុំបំពាក់នៅទីស្តីការក្រសួងសាធារណការនិងដឹកជញ្ជូនដោយឥតគិតថ្លៃដើម្បីសម្រួលការប្រើប្រាស់ផ្លូវល្បឿនលឿនបានឆាប់រហ័ស។

បើតាមរបាយការណ៍របស់ក្រសួងសាធារណការ ក្នុងរយៈពេល ៣ ថ្ងៃ នៃឱកាសឆ្លងឆ្នាំសកល ២០២៤ ករណីគ្រោះថ្នាក់ចរាចរណ៍នៅលើផ្លូវល្បឿនលឿនភ្នំពេញខេត្តព្រះសីហនុមានតែ ៥ ករណី តែមិនបង្កឲ្យមានគ្រោះថ្នាក់ដល់អាយុជីវិតនោះទេ៕

Related Topics:លោក ហ៊ាង សុទ្ធាយុត្តិ